कोरियामा एकैदिन ५९४ जनालाई कोरोना संक्रमण !

काठमाडौं, १७ फागुन । चीन कोरोना भाइरसको इपिसेन्टर हो । त्यसैले चीनमा कोरोना संक्रमितको संख्या सबैभन्दा धेरै छ र ज्यान जानेहरुको ठूलो हिस्सा चीनबाटै छन् । विशाल जनसंख्या हुनु र रोग फैलावटको इपिसेन्टर भएकोले चीनमा संक्रमित र मृतकको संख्या धेरै हुनु स्वभाविक नै हो ।

चीनपछाडि दक्षिण कोरिया कोरोना संक्रमणको फैलावट र क्षति बढी भएको देश बनेको छ । त्यहाँ शुक्रबार मात्र ५९४ जनामा कोरोनाभाइरस सङ्क्रमणको पुष्टि गरिएको छ ।

कोरिया सेन्टर्स फर डीजीज कन्ट्रोल एन्ड प्रीभेन्सनका अनुसार दक्षिण कोरियामा २,९३१ जना कोभिड-१९ का बिरामी छन्, जसमध्ये १६ जनाको मृत्यू भइसकेको छ । दक्षिण कोरियामा कोरोनाको इपिसेन्टर दक्षिण-पूर्वी डाएगु सहर बनेको छ । त्यहाँ सिन्चोञ्जी चर्च नामक समूहको सदस्यहरूबाट संक्रमण सुरु भएको बताइन्छ ।

एक ६१ वर्षीया महिलालाई कोरोना संक्रमणको शंका गरिए पनि उनी अस्पताल जान नमानेर चर्चमा प्राथनाका लागि गएकी थिइन् ।

पछिल्लो तथ्यांकअनुसार अहिलेसम्म ५० भन्दा बढी देशमा कोरोनाभाइरस सङ्क्रमण फैलिएको खबर प्राप्त भएको छ । बीबीसीका अनुसार अहिलेसम्म ८३,६५० जनालाई सङ्क्रमण भएको छ र २,७९१ जनाको मृत्यु भइसकेको छ ।

सबै महादेशमा फैलनेक्रममा रहेको कोरोनाबाट बेलारुस, लिथुआनिया, नेदरल्यान्ड्स, न्यूजील्यान्ड र नाइजेरियामा कोरोना पुगिसकेको छ । जापानको समुद्र किनारमा भएको डायमन्ड प्रिन्स नामक जहाजमा सवार एक ब्रिटिश यात्रुको मृत्यु भइसकेको छ ।

कोरोनाको कारण विश्व अर्थतन्त्र ओरालो लाग्ने क्रममा छ भने हजारौं कार्यक्रमहरु प्रभावित भइरहेका छन् ।