जलवायु न्याय र क्षतिपूर्तिको माग गर्दै भोटेकोशी बिपदमा ज्यान गुमाएका श्रमिकको स्मृतिमा जिफन्टद्वारा दीप प्रज्वलन

असोज, ३  काठमाडौं। नेपाल ट्रेड युनियन महासंघ (जिफन्ट)ले भोटेकोशी र त्रिशूली नदी क्षेत्रमा आएको विनाशकारी हिमपहिरो तथा बाढीमा परी ज्यान गुमाएका र बेपत्ता भएका श्रमिकहरूको स्मृतिमा काठमाडौंको वसन्तपुरमा दीप प्रज्वलन तथा श्रद्धाञ्जली कार्यक्रम आयोजना गरेको छ।

जिफन्टले जलवायु न्याय, प्रभावित समुदायका लागि क्षतिपूर्ति तथा श्रमिक र लैंगिक न्यायमा आधारित नवीकरणीय ऊर्जा संक्रमणको माग गर्दै  जीवाश्म–इन्धनमुक्त भविष्यका लागि अन्तर्राष्ट्रिय अभियानमा समेत आफ्नो  ऐक्यबद्धता जनाएको हो।

भाद्र १० गते भोटेकोशी र त्रिशूली नदी क्षेत्रमा आएको हिमपहिरो तथा बाढीबाट ठूलो मानवीय तथा भौतिक क्षति भएको थियो। विपद्का कारण जनधनसँगै कृषियोग्य जमिन, सडक, पुल, जलविद्युत् आयोजना र स्थानीय समुदायको जीविकोपार्जनमा समेत गम्भीर असर परेको थियो।

जिफन्टले अनुदानमा आधारित जलवायु वित्तको व्यवस्था गर्न, जीवाश्म इन्धनमा हुने सार्वजनिक लगानी अन्त्य गर्न तथा श्रमिक र लैंगिक न्याय सुनिश्चित हुने गरी नवीकरणीय ऊर्जातर्फ संक्रमण गर्न माग गरेको छ।

जिफन्टका अध्यक्ष विनोद श्रेष्ठले जलवायु संकटको प्रत्यक्ष प्रभाव श्रमिक वर्गमा परेको उल्लेख गर्दै विपद्पछिको पुनरुत्थान र पुनर्निर्माणमा श्रमिकको अधिकार तथा सामाजिक सुरक्षालाई प्राथमिकता दिनुपर्ने बताए। अध्यक्ष श्रेष्ठले  जलबायु संकट भविष्यको मात्र नभई वर्तमानकै गम्भीर चुनौती भएको उल्लेख गर्दै राहत र पुनर्निर्माणसँगै जलवायु संकटका मूल कारण सम्बोधन गर्न संबंधित पक्षले ढिलाई गर्न नहुनेमा जोड दिएका छन् ।

उक्त कार्यक्रममा विपद्मा ज्यान गुमाएका तथा बेपत्ता भएका श्रमिकका परिवारसहित जिफन्टका विभिन्न क्षेत्रका श्रमिक तथा अभियन्ताहरूको सहभागिता रहेको थियो। सहभागीहरूले दिवंगत श्रमिकहरूको स्मृतिमा दीप प्रज्वलन गर्दै श्रद्धाञ्जली अर्पण गरेका थिए।