बंगालको खाडीको न्यून चापीय प्रणालीको प्रभाव: बिहीबारदेखि वर्षा र हिमपातको सम्भावना, सतर्कता अपनाउन आग्रह

८ कार्तिक २०८३, आइतबार,काठमाडौं। बंगालको खाडीमा विकसित भइरहेको न्यून चापीय प्रणालीका कारण आगामी बिहीबारदेखि नेपालका विभिन्न स्थानमा वर्षा र हिमपातको सम्भावना देखिएको छ। मौसमविद्हरूका अनुसार यो प्रणाली भारतको आन्ध्र प्रदेश, ओडिसा र बिहार हुँदै नेपालतर्फ अघि बढ्नेछ र यसको प्रभाव बिहीबार रातिदेखि अझ बढ्नेछ।

प्रारम्भिक आकलनअनुसार मनाङसहित कम्तीमा २९ जिल्ला यसबाट बढी प्रभावित हुन सक्नेछन्। विशेष गरी कोशी, मधेश, बागमती, गण्डकी र लुम्बिनी प्रदेशमा वर्षाको प्रभाव बढी रहने देखिएको छ भने सुदूरपश्चिम र कर्णाली प्रदेशमा तुलनात्मक रूपमा कम प्रभाव पर्ने अनुमान गरिएको छ। हिमाली क्षेत्रमा भारी हिमपात तथा पहाडी क्षेत्रमा पहिरो र तराई-मधेशमा डुबानको जोखिम रहन सक्ने भएकाले विशेष सतर्कता अपनाउन सुझाव दिइएको छ।

 राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले विशेषगरी बिहीबार, शुक्रबार र शनिबारको समयमा उच्च सावधानी अपनाउन, दशैंपछि आफ्नो कार्यस्थलमा फर्कने तयारीमा रहेका तथा हिमाली क्षेत्रमा पदयात्रामा जानेहरूलाई शुक्रबार र शनिबार यात्रा नगर्न, धान काट्ने योजना बनाएका किसानहरूलाई पनि बिहीबार, शुक्रबार र शनिबार धान काट्ने काम स्थगित गर्न आग्रह गर्नुभएको छ ।