कश्मीरका विषयमा भारतको लोकसभामा हंगामा

साउन २१,काठमाडौं : भारतको लोकसभामा जम्मु तथा कश्मीर सम्बन्धी धारा ३७० खारेज गर्ने तथा राज्यलाई विधभाजन गर्ने विषयमा भएको बहसमा चर्काचर्की परेको छ । 

बहसका क्रममा गृहमन्त्री अमित शाहले आफूहरू कश्मीरका लागि मर्न तयार रहेको बताएका छन् ।

लोकसभामा कांग्रेसका नेता अधीर रञ्जन चौधरीले गृहमन्त्रीलाई सोधे, ‘एस जयशंकरले माइक पम्पिओलाई कश्मीर द्विपक्षीय मामिला हो त्यसैले हस्तक्षेप नगर्नुस् भनी केही दिनअघि भनेका थिए । अब जम्मु तथा कश्मीर आन्तरिक मामिला नै रहन्छ त ? हामी जान्न चाहन्छौं ।’

शाहले जवाफ दिए, ‘जम्मु तथा कश्मीर भारतको अभिन्न अंग हो र यो भारत अनि जम्मु तथा कश्मीरको संविधानमा छ । त्यसैले संसद्ले राज्यका विषयमा कानून बनाउने पूर्ण हक राख्छ ।’

यसपछि विपक्षीहरूले सोधे, ‘त्यसो भए पाकिस्तान अधीनस्थ कश्मीरका विषयमा तपाईंको के अडान छ त ?’ यो प्रश्नलाई चित्त नबुझाएको देखिएका अमित शाहले भने, ‘मैले जम्मु तथा कश्मीर भनेर पाकिस्तान अधीनस्थ कश्मीर र अक्साई चीन क्षेत्रलाई पनि इंगित गरेको हुँ । तपाईं पाकिस्तान अधीनस्थ कश्मीर भारतको अंग हो भनी मान्नुहुन्न र ?’

यसमा चौधरीले सोधे, ‘तपाईं किन आक्रामक भएको ?’

अनि गृहमन्त्रीले जवाफ फर्काए, ‘म आक्रामक हुन्छु, हामीहरू कश्मीरका लागि मर्न तयार छौं ।’

राज्यसभामा संकल्प प्रस्ताव र विधेयक पारित भएको एक दिनपछि लोकसभामा यससम्बन्धी बहस चलिरहेको छ । एजेन्सी