काश्मिमा मारिएका सैनिक परिवारलाई अमिताभ बच्चनले प्रति परिवार ५-५ लाख दिने

फागुन ५, काठमाडौँ । भारतको पुलवामा भएको दुर्घटनामा शहीद भएका ४० सैनिक जवानका परिवारलाई अमिताभ बच्चनले २ करोड सहयोग गर्ने घोषणा गरेका छन् ।

महानायक अमिताभ बच्‍चनले प्रत्येक शहीद जवानका परिवारलाई ५–५ लाख रुपैयाँ आर्थिक सहयोग गर्ने घोषणा गरेका हुन् ।

घटनामाथि बलिउडका हस्तीहरुले आक्रोश पोख्दै यसको बदला लिन सरकारसँग अपिल गरेका छन् ।

अभिनेता अमिताभ बच्‍चनलाई सैनिकमाथिको हमलाले दुःखी बनाएको छ । उनले आफ्ना कार्यक्रमहरु पनि रद्द गरेका छन् ।

देशका लागि आफ्नो ज्यान दिने ४० सैनिकमध्ये १२ जवान उत्तर प्रदेशका सपूत हुन् । उत्तर प्रदेशका योगी सरकारले यस शहीदका परिवारलाई २५–२५ लाख रुपैयाँ आर्थिक सहयोग र परिवारका एक सदस्यलाई सरकारी जागिर दिने घोषणा गरेको छ । 

१४ फ्रेबुअरीको साँझ जम्मू काश्मिरको पुलवामा छुट्टी मनाएर काममा फर्कदै गरेका करिब दुई हजार ५०० सुरक्षाकर्मी लिएर गइरहेका ७८ ओटा सवारी साधनलाई लक्षित गरी विस्फोटक पदार्थले भरिएको एक भ्यानले आत्मघाती आक्रमण गरिएको थियो । उक्त आक्रमणमा परी करिब ४० जना सैनिकको मृत्यु भएको थियो ।

यस आक्रमणको जैस ए–मोहम्मद इस्लामिक समूहले जिम्मेवारी लिएको छ । सैनिक सवार साधनमाथि स्थानीय लडाकू आदिल अहमदले आत्मघाती आक्रमण गरेको बताइएको छ ।

सन् १९४७ मा बेलायतबाट स्वतन्त्र भएपछि काश्मिरलाई भारत र पाकिस्तानतर्फ विभक्त गरिएको थियो । आणविक हतियार भएका भारत र पाकिस्तानबीच काश्मिरको विषयलाई लिएर तीन पटक युद्ध भइसकेको छ ।