काबुलमा शक्तिशाली विस्फोटन : चारजनाको मृत्यु, ९३ घाइते

एजेन्सी, १ माघ : अफगानिस्तानको राजधानी काबुलमा एउटा शक्तिशाली विस्फोटन भएको छ । विस्फोटनमा चारजनाको मृत्यु र धेरै घाइते भएको देशको स्वास्थ मन्त्रालयले बताएको छ ।

‘ग्रिन भिलेज’ परिसर नजिक भएको सोमबारको विस्फोटनको जिम्मेवारी तालीवान समूहले लिएको छ । पूर्वी काबुलमा रहेको सो ग्रिन भिलेजमा धेरैवटा अन्तर्राष्ट्रिय कम्पनी र दातृ संस्थाहरु अवस्थित छन् ।

घटनामा २४ बालबालिकासहित ९३ जना घाइते भएको अफगानिस्तानको सार्वजनिक स्वास्थ मन्त्रालयका प्रवक्ता वहीदुल्लाह मयरले ट्वीटर पोस्टमा बताएका छन् ।

ग्रिन भिलेजको उच्च सुरक्षा सम्पन्न परिसरबाहिर एउटा बमसहितको कारमा बिस्फोटन भएको थियो । हमलामा अधिकांश पीडितहरु नागरिक रहेका छन् ।

तालीवानका प्रवक्ता जबीहुल्लाह मुजाहिदले सो हमलाका जिम्मेवार लडाकू समूह भएको बताएका छन् । ती प्रवक्ताले भने हमलामा दर्जनौं विदेशी तथा अफगानी सुरक्षा फौजहरु मारिएको र घाइते भएको बताएका छन् । हमलामा पाँच हमलाकारी र एकजना आत्मघाती हमलाकारी संलग्न रहेको बताएका छन् ।

तालीवानले उसको अधिकांश हमला अफागन सरकार र विदेशीप्रति लक्षित हुने गरेको छ ।