खशोग्गीको हत्यामा साउदी युवराजको संलग्नता रहेको संकेत दिए अर्दोआनले

साउदी अरबका पत्रकार जमाल खशोग्गीको इस्तानबुलमा भएको हत्यामा साउदीबाट आएका दुई टोलीको संलग्नता रहेको टर्कीका राष्ट्रपति रेसेप तैयिप अर्दोआनले बताएका छन् ।

संसदमा मंगलवार सम्बोधन गर्दै अर्दोआनले यो हत्या योजनाबद्ध रूपमा गरिएको प्रमाण टर्कीका सुरक्षा सेवाहरूसँग रहेको बताए । ‘टर्की र बाँकी विश्व सबै योजनाकार र हत्याराहरूलाई न्यायको कठघरामा उभ्याएपछि मात्र सन्तुष्ट
हुनेछन् । अन्य देशले पनि अनुसन्धानमा भाग लिनुपर्छ,’ उनले भने ।

अर्दोआनले थपे, ‘म राजा सलमानको इमान्दारीमा शंका गर्दिनँ । तर यस घटनामा स्वतन्त्र अनुसन्धान हुनुपर्छ । यो राजनीतिक हत्या हो ।’

उनले भने, ‘पन्ध्रजना व्यक्तिको टोली टर्कीमा किन आएको हो ? कसको आदेशमा उनीहरू आए ? घटनापछि वाणिज्य दूतावासमा अनुसन्धान अधिकारीहरूलाई तत्कालै किन पस्न दिइएन ? साउदीहरूले फरक फरक किसिमका
बयान किन दिए ? खशोग्गीको लाश लुकाउने स्थानीय सहयोगी को हो ? साउदीले यी सबै प्रश्नको उत्तर दिनुपर्छ ।’

अर्दोआनको सम्बोधनले साउदी युवराज मोहम्मद बिन सलमान यस घटनामा निर्दोष नरहेको दह्रो संकेत दिएको द गार्डियन पत्रिकाका मध्यपूर्व संवाददाता बेथन मक्केर्नन लेख्छन् । अर्दोआन टर्कीले पनि फौजदारी अनुसन्धान गरोस् भन्ने चाहन्छन् । 

खशोग्गी भयानक हत्याको पीडित भएको प्रमाण भेटिएको र यो अत्याचारलाई ढाकछोप गर्नु नहुने अर्दोआनको भनाइ छ । उनको हत्या अन्तर्राष्ट्रिय मुद्दा भएकाले टर्कीले यसमा अनुसन्धान अघि बढाउने पनि अर्दोआनले बताए ।