वैज्ञानिक स्टिफन हकिङको ह्विलचियर र थेसिस लिलाम हुँदै

संसारकै महान् वैज्ञानिक स्टिफन हकिङलाई सबैले ह्विलचियरमा देखे । त्यही ह्विलचियरको अब लिलामी हुने भएको छ । 

ह्विलचियरसँगै उनको शोधपत्र तथा त्यससँग सम्बन्धित महत्वपूर्ण वस्तुको समेत लिलामी हुने बताइएको छ । लिलामीघर ‘क्रिस्टी’ले सोमबार हकिङको २२ चिजको अनलाइन बिक्रीको घोषणा गरेको थियो । यसमा ब्रह्मान्डको उत्पत्तिबारे उनले गरेको थेसिस, उनले पाएका केही पुरस्कार र वैज्ञानिक शोधपत्र समावेश गरिनेछ । शोधपत्रहरुमा ‘स्पेक्ट्रम अफ वार्महोल्स’ तथा ‘ब्रेकडाउन अफ फिजिक्स इन ग्राभिटेसनल कोल्याप्स’ सामेल रहेका छन् । लिलामीको समयमा उनलाई लोकप्रिय भौतिकशास्त्रीका रुपमा हेरिने भएको छ । 

क्रिस्टीका पुस्तक तथा पान्डुलिपि विभाग प्रमुख थोमस वेनिङ भन्छन्, ‘यी शोधपत्रले हकिङको सोचको विकासक्रम, उनको बुद्धिमत्तालाई दर्शाउनेछ ।’ हकिङ एकजना कस्मोलोजिस्ट तथा स्पेस ट्राभलरका रुपमा विश्वमा प्रसिद्ध रहे । र, अन्तरीक्षमा रहेको ब्ल्याकहोलका बारेमा उनको अनुसन्धानले हमेसा प्राथमकिता पायो ।  

को हुन् हकिङ ?

२२ वर्षको उमेरमा उनलाई ‘मोटर न्युरोन’ रोग लागेको पत्ता लागेपछि २ वर्षमात्र बाँच्ने चिकित्सकले बताएका थिए ।  त्यसपछि उनले वर्षौंसम्म ह्विलचियरमा बसेर भौतिकशास्त्रका क्षेत्रमा आफ्नो शोधमा तल्लीन रहे । युनिभर्सिटी आफ क्याम्ब्रिजमा म्याथमेटिक्सका प्रोफेसरका रुपमा उनले प्राध्यापन गरे । उनको प्रसिद्ध पुस्तक ‘अ ब्रिफ हिस्ट्री अफ टाइम’ बेस्टसेलर बन्यो । यो पुस्तक बीसौं शताब्दीको एउटा ‘आइकन’ नै बन्न सफल भयो । सन् १९४२ मा जन्मेका उनको गत मार्चमा ७६ वर्षको उमेरमा निधन भयो । एजेन्सी