श्रावण १५

एजेन्सी । दोस्रो विदेश भ्रमणमा रहेका बेलायतका विदेश मन्त्री जेरेमी हन्टले सोमबार चिनियाँ प्रमुख वाङ यीसँग औपचारिक भेटवार्ता गरेका छन् । पूर्वमन्त्री बोरिस जोन्सनको राजिनामासँगै हन्ट नयाँ विदेश सचिवका रुपमा नियुक्त भएका हुन् । चिनियाँ विदेश मन्त्री वाङ यीसँग यो उनको पहिलो भेट रहेको थियो । 

यसै क्रममा दुवै पक्षबीच खुला व्यापार नीति, उत्तर कोरिया र जलवायु जस्तो विश्वव्यापी समस्यामा चीन र बेलायतले कसरी एकसाथ काम गर्ने भन्ने विषयमा छलफल भएको बताइएको छ । भ्रमणमा जानुपूर्व नै हन्टले बेलायत युरोपेली युनियनबाट बाहिरिएपछि चीनसँगको व्यापारिक सम्बन्ध थप प्रगाढ बनाइने बयान दिएका थिए । यसअघि प्रधानमन्त्री टेरेजा फेब्रुअरीमा चीन भ्रमणमा आउँदा पनि उनले १ करोड २० लाख बराबरको व्यापारिक सम्झौता सुनिश्चित गरेर गएकी थिइन् । 

त्यसैगरी बैठकको समयमा मन्त्री वाङले चीनको एकल राष्ट्र नीतिबारे पुनः याद दिलाउँदै  हङकङ चीनको आन्तरिक मामिला भएकाले त्यसमा बाहिरी हस्तक्षेप स्वीकार्य नहुने पनि स्पष्ट पारेका हुन् । ताइवान, हङकङ र मकाउलाई चीनले संवेदनशील विषयका रुपमा लिँदै आएको छ । यसकारण पनि लामो समयसम्म सहकारिता कायम राख्न बेलायतले यी विषयमा कुनै चासो नदेखाएको राम्रो हुने बताइएको हो ।