मोरक्कोको बलियो डिफेन्समाथि हावी हुने दाउमा ईरान

ईरान एसियाली फुटबलमा चर्चित एवं ठूलोमा गनिन्छ । शुक्रबार समूह ‘बी’ अन्तर्गत ईरान र अफ्रिकी देश मोरक्को भिड्दैछन् । मोरक्को अहिले मनोवैज्ञानिक हारको अवस्थामा छ । सन् २०२६ को विश्वकप आयोजना गर्ने होडमा थियो । तर, अमेरिका, क्यानडा र मेक्सिकोले संयुक्त आयोजना गर्ने भएपछि मोरक्को चिन्तित छ । यसबीच टीमको समग्र प्रदर्शनमा केही प्रभाव पार्ने फुटबल पण्डितहरुले अनुमान गरेका छन् ।

ईरान विजयी शुरुआत गर्न चाहन्छ

एसियाली राष्ट्र ईरान आफ्नो निलम्बित खेलाडी सईद एजातोलाही बिना मैदानमा उत्रनेछ । त्यस्तै उसलाई मेहदी तारेमी र अशकान देजागाहको चोटको पनि चिन्ता छ । उता मोरक्को टीमले आफ्ना खेलाडी नाबिल दिरारले फिटनेस परीक्षण पास गरोस् भन्ने चाहना राखेको छ ।  ईरानले पाँचौं पटक विश्वकपको यात्रा तय गरेपनि समुह चरणबाट माथि उक्लन सकेको छैन । ईरान कठिन समुहमा छ । उसको समूहमा पोर्चुगल र स्पेनजस्ता ठूला टीमहरु  छन् । समुह चरण पार गर्न ईरानले आज मोरक्कोलाई पराजित गर्दै स्पेन र पोर्चुगलसँग संघर्ष गर्नुपर्ने हुन्छ ।

मोरक्कोलाई आफू बलियो भएको सावित गर्ने मौका

मोरक्कोले बीस वर्षपछि आफूलाई सावित गर्ने मौका पाएको छ । मोरक्कोसँग यो आशा रहनेछ कि ईरानमाथि जीत हासिल गर्दै दुई शीर्ष टोलीसँग डटेर सामना गर्ने र नतिजा आफ्नो पोल्टामा पार्ने । मोरक्कोले एक गोल पनि नखाई विश्वकपको यात्रा तय गरेको थियो । मोरक्कोको डिफेन्स निकै नै बलियो छ । मोरक्कोले १८ म्याचमा लगातार जीत हासिल गरेको थियो ।