राजधानीमा हिजो भएको एक कार्यक्रममा दिल्ली डेयरडेभिल्सका सिइओ हेमन्त दुवा र राष्ट्रिय खेलकुद परिषदका सदस्यसचिव केशवकुमार विष्टले सन्दीपको जर्सी सार्वजनिक गरे।
जर्सी सार्वजनिक गर्दै सिइओ दुवाले आफ्ना लागि यो महान क्षण भएको बताए। ‘सन्दीपले दिल्ली र नेपाललाई अझ गर्व महसुस गराउनेछन् भन्ने मेरो विश्वास छ,’ दुवाले भने।
आइपिएलमा सन्दीपले प्लेइङ इलेभेनमा मौका पाउलान् या नपाउलान् भन्ने प्रश्नमा दुवाले त्यो निर्णय प्रशिक्षक र क्याप्टेनको हातमा रहेको बताए। उनले मार्च २७ देखि आइपिएल सो क्लबको अभ्यास सुरु हुने जानकारी दिँदै अभ्यासमा सन्दीपले पर्याप्त मौका पाउने बताए। ‘यदि अभ्यासमा उनले राम्रो गरे भने लेइङ ११ मा स्थान पाउनेछन्,’ दुवाले भने।
सन्दीपले भने आफ्ना लागि प्लेइङ ११ मा मौका पाउनु नपाउनु त्यति महत्वपूर्ण नभएको बताए। ‘मेरोलागि मेरो टिमले जित्नु चाहिँ बढी महत्वपूर्ण छ,’ सन्दीपले भने।
जर्सी ग्रहण गर्दै सन्दीपले आफू सँधै एक नम्बर हुने चाहना राख्ने हुनाले जर्सी पनि एक नम्बर नै छानेको बताए।
