स्वचालित बसले सेवा सुरु गरेको पहिलो दिनमै दुर्घटना

एजेन्सी : अमेरिकाको लास भेगसमा एउटा स्वचालित यात्रु बस सेवा दिन सुरु गरेको पहिलो दिनमै दुर्घटनामा परेको छ ।

धेरै यात्रुहरु सवार भनिएको उक्त चालकविहीन बस सुस्त गतिमा गुडिरहेको एउटा लरीसँग ठोक्किएर दुर्घटनामा परेको हो । दुर्घटनामा कसैलाई चोटपटक भने लागेको छैन । लरीका चालकको मानवीय त्रुटिका कारण उक्त दुर्घटना भएको बताइएको छ ।

सिटी अफ लास भेगसका प्रवक्ताले बस र लरी सामान्य रुपमा ठोक्किएको र नियमित जाँचपछि बस पुन सञ्चालनमा आउने बताएका छन् । उक्त चालकविहीन यात्रु बस अमेरिकाका सार्वजनिक सडकमा पहिलो पटक गुडाइएको त्यस्तो प्रकृतिको सवारी साधन हो । अधिकतम गति ४५ किलोमिटर प्रति घण्टा रहेको मानव रहित बसमा बढीमा १५ जना यात्रु चढ्न मिल्ने बताइएको छ ।

स्वचालित प्रविधिबाट चल्ने सवारी साधनहरु विगतमा पनि दुर्घटनामा परेका छन् । अहिलेसम्म आएका विवरणमा लगभग सबै दुर्घटनामा मानवीय त्रुटि कारण देखिने गरेको छ । यसअघि उबर नामक कम्पनीले एरिजोनामा चलाएको एउटा स्वचालित गाडी सडकमा रहेको अर्को गाडीका चालकले बाटो नछाड्दा पल्टिएको थियो ।