म्यानचेस्टर सिटीको विजय सुरुआत

इंग्लिस प्रिमियर लिग फुटबलमा म्यानचेस्टर सिटीले विजय सुरुवात गरेको छ । शनिबार राति भएको सिजनको पहिलो खेलमा म्यानचेस्टर सिटीले प्रिमियर लिगको नयाँ क्लब ब्राइटन अल्बियोनलाई २ – ० ले पराजित गरेको हो  । 

ब्राइटनको घरेलु मैदानमा भएको खेलमा सिटीलाई जित दिलाउन सर्जियो अग्युरोले एक गोल गरे । सिटीले एक गोल आत्मघाती उपहार पाएको थियो । यसै सिजन प्रिमियर लिगमा बधुवा भएको ब्राइटनले बलियो टोलि सिटीलाई पहिलो हाफ गोलरहित बराबरीमा रोकेको थियो । तर, दोस्रो हाफमा ब्राइटनले उक्त प्रदर्शन  दोहोराउन सकेनन् । 

दोस्रो हाफको ७० औं मिनेटमा अग्युरोले गोल गर्दै सिटीलाई १ – ० को अग्रता दिलाए । त्यसको पाँच मिनेट नबित्दै सिटीले आत्मघाती गोलको  उपहार पायो ।  खेलको ७५ औ मिनेटमा ब्राइटनका लेविस डुंकले बल क्लियर गर्ने क्रममा आफ्नै पोष्टमा गोल गरेका थिए । त्यसपछि दुवै टोलीले गोल गर्न सकेनन र खेल सिटीले २ – ० ले जित्दै नयाँ सिजनको उत्कृष्ट सुरुवात गर्यो ।

जितसँगै म्यानचेस्टर सिटीले  ३ अंक जोडेको छ । र, सिटि लिगको दोस्रो स्थानमा छ । लिगको शिर्ष स्थानमा यसै सिजन प्रिमियर लिगमा बढुवा भएको हडर्सफिल्ड टाउन रहेको छ । हडर्सफिल्डले शनिबार राति क्रिष्टल प्यालेसलाई ३ – ० ले पराजित गरेको थियो ।