चिनियाँ अपराधकर्मी पक्राउ

म्याड्रिड । विभिन्न अपराधमा संलग्न रहेको आरोपमा २५ जना चिनियाँको एक अपराधी समूहलाई उत्तरपूर्वी स्पेनको क्याटोलिना क्षेत्रीय प्रहरी कार्यालयले पक्राउ गरी हिरासतमा लिएको छ । यस अपराधी समूहद्वारा जबर्जस्ती बेश्यावृत्तिमा लाग्न बाध्य बनाइएका २२ जना चिनियाँ युवतीलाई पनि प्रहरीले मुक्त गराएको छ ।

यो अपराधी समूहले नगरमा अबैध बेश्यावृत्ति सञ्चालन, लागुपदार्थ ओसारपसार तथा बेचबिखनलगायत विभिन्न अपराध गर्दै गराउँदै आएको समेत स्पेनिस प्रहरीले आरोप लगाएको छ । यही अपराधी समूहका बदमासले अन्य मुलुकमा रहेका सीधासादा चिनियाँ युवतीहरूलाई ललाई फकाई, उनीहरूबाट पैसा लिई नक्कली कागजतपत्र बनाई स्पेन छिराउने र अन्ततः बेश्यावृत्ति वा अन्य प्रकारका यौन धन्दामा लगाउने गरेका थिए ।

ती सीधासादा चिनियाँ युवतीहरूलाई १५ हजार युरो (१६ हजार अमेरिकी डलर) ठगेको आरोप पनि स्पेन प्रहरीले यिनीहरूमाथि लगाएकोमा स्पेनको एउटा स्थानीय अदालतमा मुद्दा सुनुवाई हुँदा यीमध्ये ११ जनालाई काराबासको सजाय तोकिएको थियो । तीमध्ये बाँकी १४ जनाको राहदानी जफत गर्नुका साथै सामान्य जरिवाना तिराई प्रहरी हिरासतबाट मुक्त गरिएकोसमेत जनाइएको छ । –एपी