ज्येष्ठ नागरिकले सामाजिक सुरक्षा भत्ता पाएनन्

रुकुम । रुकुमको चौरजहारी नगरपालिकाका लक्षित वर्गले चालु आव २०७३÷०७४ को पहिलो चौमासिकको सामाजिक सुरक्षा भत्ता अझै पाउन सकेका छैनन् ।

बैंकमार्फत सामाजिक सुरक्षा भत्ता वितरण गर्ने अभ्यास थालिएपछि दोस्रो किस्ता पाउने समयसम्म पनि लक्षित वर्गले गत साउनदेखिको भत्ता अहिलेसम्म पनि पाउन नसकेका हुन् । अघिल्लो वर्षतिर समयमै भत्ता पाउने गरेको भए पनि यो वर्ष भने समयमै भत्ता नपाएको चौरजहारी–७ का ७२ वर्षीय नरबहादुर खत्रीले बताए ।

पटकपटक बैंकमा जाँदा पनि सुरक्षा भत्ता पाउन नसकेको लक्षित वर्गको गुनासो छ । एक महिनासम्म बैंकमा खाता खोल्ने समय लागेको र त्यसपछि मन्त्रालयमा इन्ट्री गर्नुपर्ने भएकाले भत्ता वितरणमा ढिलाइ भएको चौरजहारी नगरपालिकाका कार्यकारी अधिकृत महेशकुमार गुरुङले बताए। अहिले नगरपालिकाभित्र सामाजिक सुरक्षा भत्ता पाउने एक हजार ६९ जना व्यक्ति रहेको उनले जानकारी दिए ।

बैंकमा पैसा जम्मा भइसकेको र अब केही सामान्य कुरा मिलाएर छिट्टै प्रत्येकको खातामा पैसा जम्मा गरिने कार्यकारी अधिकृत गुरुङले बताए । रासस