पाटन उच्च अदालत बारमा पहिलोपटक स्वतन्त्र मञ्चको पूर्ण प्यानल

काठमाडौं, साउन २२ । उच्च अदालत बार एशोसिएशन पाटनको साउन ३० गते हुने कार्यसमिति तथा कार्यकारिणी परिषद् (पार्षद) निर्वाचनका लागि  उम्मेदवारी दर्ता सम्पन्न भएको छ। यसपटकको निर्वाचनमा पहिलो पटक स्वतन्त्र कानून व्यवसायी मञ्चले अध्यक्षदेखि पार्षदसम्म सबै पदमा पूर्ण प्यानलसहित उम्मेदवारी दर्ता गराएको जनाएको छ। यसअघि उक्त बारमा प्रायः पिपिएलएको नेतृत्व रहँदै आएको र अन्य समूहले पूर्ण प्यानलसहित प्रतिस्पर्धा नगरेको मञ्चको दाबी छ।

निर्वाचनमा पिपिएलए गठबन्धनसहित, स्वतन्त्र कानून व्यवसायी मञ्च र डिएलए आफ्ना–आफ्नै प्यानलसहित प्रतिस्पर्धामा उत्रिएका छन्। स्वतन्त्र मञ्चका अध्यक्ष पदका उम्मेदवार भेषराज पोखरेलले संस्थागत सुशासन, व्यावसायिक स्वतन्त्रता, युवा कानून व्यवसायीको अवसर, महिला सहभागिता तथा पेशागत अधिकार संरक्षणलाई आफ्नो मुख्य एजेन्डा बनाइएको बताउनुभयो।

स्वतन्त्र कानून व्यवसायी मञ्चका कार्यवाहक अध्यक्ष हरिचन्द्र भट्टराईले पहिलो पटक पूर्ण प्यानलसहित उम्मेदवारी दर्ता हुनु उच्च अदालत बार एशोसिएशन पाटनको निर्वाचन इतिहासमा लोकतान्त्रिक प्रतिस्पर्धाको नयाँ अध्याय भएको दाबी गर्नुभयो।