उपत्यकामा रात्रिकालीन बस सेवा विस्तार: ९ स्थानीय तह र साझा यातायातबीच समझदारी

काठमाडौं, असोज ४ । काठमाडौं उपत्यकामा रात्रिकालीन यातायात सेवालाई थप सहज र सुरक्षित बनाउने उद्देश्यले उपत्यकाका ९ वटा स्थानीय तह र साझा यातायातबीच समझदारीपत्रमा हस्ताक्षर भएको छ। संविधान दिवसको अवसर पारेर गरिएकाे यस समझदारीसँगै उपत्यकामा ३० वटा बसमार्फत रात्रिकालीन सेवा विस्तार गरिएको छ।

सञ्चालन रुटहरू: जगाती–सूर्यविनायक–ठमेल, लगनखेल–गोदावरी, रिङरोड (दुवै दिशा), कीर्तिपुर–जमल, टाखेल–ठमेल र नागढुङ्गा–एयरपोर्ट रुटमा सेवा सञ्चालन हुनेछ। काठमाडौं र ललितपुर महानगरपालिका तथा बूढानीलकण्ठ, गोदावरी, चन्द्रागिरि, कीर्तिपुर, भक्तपुर, सूर्यविनायक र मध्यपुर थिमि नगरपालिका सहकार्य गर्ने निकायहरू हुन।

 सेवा सञ्चालनमा अपुग हुने रकमको ५० प्रतिशत ७ वटा नगरपालिकाले र बाँकी ५० प्रतिशत जनसङ्ख्याका आधारमा काठमाडौं, ललितपुर र अन्य नगरपालिकाहरूले बेहार्ने सहमति भएको छ। यात्रुहरूको सहजता र आर्थिक पारदर्शिताका लागि साझा यातायातले आर्थिक चुहावट रोक्न र सहजताका लागि क्यूआर तथा नगदबाट भुक्तानी गर्न सकिने डिजिटल टिकेटिङ प्रणाली लागू गरिएको छ। साथै, आर्थिक वर्ष २०८३/८४ भित्र डिजिटल साइनेजसहितको बस स्टप निर्माण गरिनेछ।