नयाँ वर्षको सुरुआतसँगै एआईको प्रभाव, सेयर बजार सुदृढ

१८ पुस,टोकियो । एसियाली सेयर बजारले सन् २०२६ को सुरुआत सकारात्मक संकेतका साथ गरेका छन् । टोकियो र साङ्घाई बजार सार्वजनिक बिदाका कारण बन्द रहेकाले कारोबारको मात्रा सीमित भए पनि समग्र बजार धारणा उत्साहजनक देखिएको छ । लगानीकर्ता हाल अमेरिकी वाल स्ट्रिटबाट आउने नयाँ आर्थिक सङ्केतको प्रतीक्षामा छन् ।

सन् २०२५ मा विश्व सेयर बजारले उल्लेखनीय वृद्धि हासिल गरेको थियो । अमेरिकाको एस एन्ड पी ५०० सूचकाङ्क १६.४ प्रतिशतले बढ्दा प्रविधि केन्द्रित नास्ड्याक २०.४ प्रतिशतले उकालो लागेको थियो । बेलायतको एफटीएसई सूचकाङ्कले पनि १६ वर्षयताकै उत्कृष्ट क्रिसमस प्रदर्शन गरेको थियो ।

एसियाली बजारतर्फ सन् २०२५ मा दक्षिण कोरियाको सेयर बजार करिब ७५ प्रतिशतले उक्लिएको थियो । हङकङको हाङ सेङ सूचकाङ्क २८ प्रतिशतले बढ्दा जापानको निक्केई २२५ सूचकाङ्क २६ प्रतिशतभन्दा बढीले वृद्धि गरेको थियो । विश्लेषक काइल रोड्डाका अनुसार नयाँ वर्षको सुरुआतसँगै लगानीकर्ताको मुख्य चासो यही वृद्धिले निरन्तरता पाउँछ कि पाउँदैन भन्ने हो । बजारको साझा धारणा भने सकारात्मक प्रवृत्ति कायम रहनेतर्फ छ ।

उनका अनुसार अमेरिकी अर्थतन्त्रमा वृद्धिदर कायम रहने, मुद्रास्फीति नियन्त्रणमा रहने र आगामी दिनमा ब्याजदर घट्ने अपेक्षाले सेयर बजारलाई थप टेवा पुग्ने अनुमान गरिएको छ ।

शुक्रबार हङकङको सेयर बजार २.२ प्रतिशतले बढेको छ । चिप डिजाइन कम्पनी बिरेन टेक्नोलोजिज आफ्नो प्रारम्भिक सार्वजनिक निष्कासन (आईपीओ)पछि ८० प्रतिशतले उकालो लागेको छ । कम्पनीले ७० करोड अमेरिकी डलरभन्दा बढी रकम सङ्कलन गरेको छ, जसले कृत्रिम बौद्धिकता (एआई) क्षेत्रमा लगानीकर्ताको चासो अझै मजबुत रहेको संकेत दिएको छ ।

यसैबीच, चिनियाँ खोज इन्जिन कम्पनी बाइडुले आफ्नो एआई चिप इकाइ ‘कुनलुनसिन’ लाई हङकङमा सूचीकृत गर्ने प्रक्रिया अघि बढाएको घोषणा गरेपछि बाइडुको सेयर करिब ७ प्रतिशतले बढेको छ ।

ताइपेई, सिड्नी, जकार्ता, मनिला र सिङ्गापुरका सेयर बजार पनि उकालो लागेका छन् । दक्षिण कोरियाको कोस्पी सूचकाङ्क १.७ प्रतिशतले बढ्दा सामसुङ इलेक्ट्रोनिक्सको सेयर मूल्य ३ प्रतिशतले वृद्धि भएको छ । कम्पनीका उच्च ब्यान्डविथ मेमोरी चिपप्रति ग्राहकबाट सकारात्मक प्रतिक्रिया आएको बताइएको छ ।

नयाँ वर्षको सुरुआतसँगै बहुमूल्य धातुको मूल्य पनि बढेको छ । सुनको मूल्य ०.६४ प्रतिशत र चाँदीको मूल्य १.५ प्रतिशतले वृद्धि भएको छ ।
रासस/एएफपी