महानगरीय प्रहरी परिसर ललितपुरले पुस २९ गते बागमती गाउँपालिका गिम्दीबाट उनलाई पक्राउ गरेको थियो। फरार प्रतिवादीलाई पक्राउ गर्न जाँदा प्रहरीले बाँस्तोलासहित विवेक कुमाल र रखायल मगरलाई नियन्त्रणमा लिएर थप अनुसन्धान गरिरहेको छ। अर्का नेता खड्गबहादुर विश्वकर्मा (प्रकाण्ड) भने सोही ठाउँबाट फुत्किएका थिए।
पक्राउ परेका तीनै जनालाई महानगरीय प्रहरी परिसरमा राखिएको छ। उनीहरूलाई पक्राउ गर्दा ल्यापटप, डायरीलगायत सामग्री बरामद भएपछि त्यसैको आधारमा थप अनुसन्धान भइरहेको प्रहरीले जनाएको छ।
सरकारको निर्देशनअनुसार नै उनीहरूको क्रियाकलापबारे सुक्ष्म अनुसन्धान भइरहेको परिसर प्रवक्ता एसपी प्रज्वल महर्जनले बताए। उनी भन्छन्, ‘सरकारको रणनीतिअनुसार अनुसन्धानका दायरा फराकिलो बनाएका छौं।’ नेता बाँस्तोलालाई विगतमा भएको बम विस्फोटनसम्बन्धी मुद्दा चलाइएको छ।
उनीविरुद्ध ललितपुरको नख्खुस्थित एनसेल कार्यालयमा बम बिस्फोट गराएको आरोपमा कर्तव्य ज्यान मुद्दा तथा फरार प्रतिवादीसम्बन्धी मुद्दा चलाइएको हो।
ललितपुर प्रहरीले विप्लव समूहका थुप्रै प्रभावशाली नेता तथा कार्यकर्ता पक्राउ गरिसकेको बताउँदै एपी महर्जनले भने, ‘हालसम्म ३६ जनालाई पक्राउ गरेर मुद्दा चलाइएको छ।’ ललितपुरको दक्षिण भेग भौगोलिक हिसाबले विकट भएकाले सोही क्षेत्रमा विप्लव समूहको गतिविधि बढ्न सक्ने ठहर गर्दै प्रहरीले नियमित गस्ती गरिरहेको छ। ‘हामीले ९० किलोमिटर टाढासम्म हेर्नुपर्छ’, महर्जनले भने ‘भौगिलिक हिसाबमा जस्तो भए पनि सुरक्षाका लागि पेट्रोलिङ बढाएका छौं। अन्नपूर्ण पाेस्ट दैनिकबाट
