संसारभर स्वास्थ्य सामग्रीको अभाव, विश्व बैंकद्वारा १२ बिलियन डलरको सहयोग

एजेन्सी, २१ फागुन । विश्व स्वास्थ्य संगठन (डब्लुएचओ) ले संसारभर स्वास्थ्य सामग्रीको अभाव हुन सक्ने चेतावनी दिएको छ । तीव्र रुपमा कोरोना भाइरस फैलिइरहेका बेला डब्लुएचओले यस्तो चेतावनी दिएको हो ।

मंगलबार डब्लुएचओले मास्कसहित विभिन्न स्वास्थ्य सामग्रीको अभाव हुन सक्ने बताएको छ । साथै व्यापारीहरूले स्वास्थ्य सामग्रीको मूल्य बढाउन सक्नेप्रति सबै सजग हुनुपर्ने डब्लुएचओको भनाइ छ ।

विश्वभर कोरोना भाइरस तीव्र रुपमा फैलिइरहेको बेला डब्लुएचओले एकातिर स्वास्थ्य सामग्रीको अभाव हुन सक्ने र अर्कोतिर मूल्य बढ्न सक्ने बताएको हो । स्वास्थ्य सामग्री उत्पादन गर्ने कम्पनी तथा मुलुकहरुलाई ४० प्रतिशतले उत्पादन वृद्धि गर्न पनि डब्लुएचओले आग्रह गरेको छ ।

यता मंगलबार अमेरिकाको फेडेरल रिजर्भ बैंकले विश्वव्यापी आर्थिक मन्दी रोक्न भन्दै ब्याजदरमा कटौती गरेको छ । त्यस्तै कोरोना भाइरससँग जुध्नका लागि विश्वबैंकले १२ बिलियन डलर उपलब्ध गराउने घोषणा गरेको छ ।

संसारभर कोरोना भाइरस फैलिएपछि हवाइ यात्रा, पर्यटन लगायतका क्षेत्र मारमा पर्न थालेका छन् । समयमा नै भाइरस नियन्त्रण नभएमा विश्वभर आर्थिक वृद्धि घट्ने चिन्ता बढिरहेको छ ।

चीनको वुहानबाट सुरु भएको कोरोना भाइरस हालसम्म ८० देशमा फैलिइसकेको छ ।

कोरोना भाइरसका कारण हालसम्म विश्वभर ३१६८ जनाको मृत्यु भएको छ । मिडिया रिपोर्टका अनुसार संक्रमितहरुको संख्या ९३ हजार नाघेको छ । ८० देशमा फैलिएको यो भाइरसले पछिल्लो समय चीनभन्दा पनि विश्वका अन्य देशहरुमा कहर मच्चाइरहेको छ ।

चीनमा विस्तारै यो भाइरसमाथि नियन्त्रण लिने प्रयास सफल हुँदै आएको बताइएको छ । चीनमा कोरोना भाइरसका कारण मर्नेहरुको संख्या २९४५ पुगेको छ भने संक्रमितहरुको संख्या ८० हजार १५२ रहेको छ ।