रक्षा बन्धनको यस्तो छ शुभ साइत !

हरेक वर्ष हिन्दु परम्पराअनुसार श्रावण शुक्लपक्ष पूर्णिमाको दिन रक्षाबन्धन पर्व मनाइने गरिन्छ । यसैदिन तागाधारीहरुले जनै फेर्ने तथा विशेष मन्त्रोचरण गरिएको डेरो बाँध्ने गरिन्छ । ज्योतिषाचार्यको अनुसार यस वर्ष रक्षाबन्धनको दिन अन्य वर्ष भन्दा विशेष रहेको जनाएका छन् । भद्रकालमा रक्षाबन्धन लगाउन नहुने ज्योतिषीहरु बताउँछन् । यो वर्ष रक्षा बन्धनका लागि बिहानदेखि बेलुका सम्म प्रशस्त समय रहेको छ ।

तर, राहु काल पनि परेकाले सचेत रहनु पर्ने बताइएको छ । आउँदो आइतबार परेको जनैपूर्णिमाको दिन अपरान्ह ४ः४५ देखि ६ः१५ बजे सम्म राहुकाल रहने भएकाले रक्षा बन्धन लगाउन नहुने भएको हो ।रक्षा बन्धनकै दिन दिदी बहिनीहरुले दाजुभाइलाई राखी बाँधिदिने चलन पनि रहेको छ ।

यस वर्ष दिदी बहिनीले आफ्नो दाजु भाइलाई ११ घण्टासम्म राखी बाध्न सक्नेछन् । आफ्नो दिदी बहिनीले दाजुभाइलाई दीर्घायूको कामना गर्दै राखी बाध्ने चलन रहेको छ ।