०२  भदौ

आज समीक्षित सबै पत्रिकामा निर्वाचन आयोग र प्रमुख तीन दल प्रदेश सभा र प्रतिनिधिसभाको निर्वाचन एकैपटक गर्न सहमत भएको खबरले महत्त्व पाएको देखिन्छ ।  

 प्रधानमन्त्री निवास बालुवाटारमा बिहीबार भएको छलफलमा प्रदेश र संघका दुईवटै निर्वाचन एकैपटक गर्न प्रमुख तीन राजनीतिक दल र निर्वाचन आयोग सहमत भएका छन् । आयोगले हिउँदमा हिउँ पर्ने हिमाली क्षेत्रका ३१ जिल्लामा ४ मंसिरमा र बाँकी जिल्लामा लगत्तै निर्वाचन गर्ने प्रस्ताव दलसामु राखेको समाचारमा जनाइएको छ । प्रधानमन्त्री शेरबहादुर देउवाले शुक्रबारसम्ममा निर्वाचन मितिको टुंगो लगाइसक्ने बताएका पनि समाचारमा उल्लेख छ ।

 समाचारअनुसार एकैपटक निर्वाचन गर्नका लागि निर्वाचन आयोगले केही सर्त अगाडि सारेको छ । मुख्य समाचारअन्तर्गत नै ‘एकैपटक निर्वाचनका लागि आयोगका सर्त’ उपशीर्षकको अर्को समाचारमा जनाइएअनुसार तीन दलसँगको बैठकमा प्रमुख निर्वाचन आयुक्त डा.अयोधीप्रसाद यादवले भदौ ५ भित्र निर्वाचन ऐन ल्याइदिन र भदौ १५ भित्र क्षेत्र निर्धारण गरिदिन आग्रह गरेका थिए ।अन्नपूर्ण पोस्टमा ‘तीन दल–आयोग छलफल, प्रदेश र संघीय चुनाव दुई चरणमा’ शीर्षक दिएर चिरञ्जीवी ढुंगानाले लेखेको समाचारमा एकै दिन दुवै निर्वाचन गर्ने गरी सरकारले आइतबारसम्म मिति घोषणा गर्ने उल्लेख छ । 

अन्नपूर्ण पोस्टमा नेकपा (एमाले) नेता सुवास नेम्बाङले दुई चरणमा मतदान हुने भए पनि मतगणना भने दोस्रो मतदान सकिएपछि मात्र सुरु गर्न आयोगले प्रस्ताव गरेको बताएका छन् । कान्तिपुरमा ‘आयोगको प्रस्ताव, चुनाव दुई चरणमा’ शीर्षक दिएर दुर्गा खनाल र राजेश मिश्रले लेखेको समाचारअन्तर्गत ‘२ मतपत्र, ४ छाप’ उपशीर्षकमा दलहरू र आयोगबीच भएको समझदारीअनुसार प्रतिनिधिसभा र प्रदेशसभाको चुनावमा प्रत्यक्ष र समानुपातिकका छुट्टाछुट्टै गरी दुइटा मतपत्र हुने तर छाप भने चार ठाउँमा लगाउनुपर्ने उल्लेख छ ।