जिल्ला प्रहरी कार्यालय महोत्तरीबाट प्राप्त पत्रअनुसार अभियुक्त विसेश्वर महतो र उनका सुवोध महतो नुनियालाई पक्राउ गर्न जाँदा असईसहित तीन प्रहरीमाथि हातपात भएको हो ।

चैत्र २ गते लक्ष्मीनियाँ–८ बस्ने विसेश्वर महतो र उनका ९ वर्षीय छोरा सुवोध महतो नुनियालाई जिल्ला प्रहरी कार्यालयमा उपस्थित गराउने पत्र अनुसार पक्राउ गर्न गएका ३ जना प्रहरी माथी हातपात भएको कान्तिबजार प्रहरी चौकीका असई जित बहादुर बस्नेतले बताएका छन् ।

स्थानीयले असई जितबहादुर बस्नेत, हवल्दार श्याम बाबु कुशवाहा र प्रहरी जवान शिव शंकर महतोमाथि हातपात गरेको असई बस्नेतले बताए ।

गत फाल्गुण २ गते चौकीमा दर्ता भएको निवेदन सम्बन्धमा गाउँमै छलफल सम्भव नभएपछि जिल्लामा उपस्थिति गराउने आदेश भएको पत्र चौकीमा प्राप्त भएपछि सोही अनुसार उनीहरुलाई पक्राउ गर्न जाँदा स्थानीय विशेश्वर महतो र आफन्त महिलाहरुले हातपात गरेको कान्तिबजार प्रहरी चौकीका असई बस्नेतले बताए ।

करिव दुई महिना अगाडि सडकछेउमा रहेको पानीमा तीन–चार जना बालबालिका खेल्ने क्रममा जिउमा पानी पर्दा भएको झगडामा नविन महतो नुनियाको हात भाँचिएको थियो । झगडामा हात भाँचिएपछि उपचारमा लागेको खर्च र सो सम्बन्धमा छलफल गर्न बोलाईएको बैठक निष्कर्ष विहिन भएपछि पीडित परिवारले प्रहरीमा उजुरी दर्ता गराएको थियो । प्रहरीले अवरोधका बीच पनि अभियुक्तलाई पक्राउ गरेको बताइएको छ ।

यता, कान्तिबजार चौकीका असई जितबहादुर बस्नेतको नेतृत्वमा गएको टोलीले महतोलाई पक्राउ गर्ने क्रममा आफन्तले हुलहुज्जत गर्न खोजेपछि भएको घटनामा एक महिला घाईते भएकी छन् । घाईते हुनेमा लक्ष्मिनियाँ ८ की ३३ वर्षीया शिवकला देवी महतो नुनिया हुन् ।

छलफल सकिनै लाग्दा त्यहाँ आएका प्रहरी टोलीले एक्कासि शिवकलामाथि कुटपिट गरेको पूर्वसभासद एवम् माओवादी केन्द्रका नेतृ वुधनीदेवी महतो नुनियाले बताइन् ।

घाईते शिवकलाको हात र छातीमा चोट लागेकोले गौशालामा प्राथमिक उपचारपछि थप उपचारका लागि जनकपुर अंचल अस्पताल लगिएको नेतृ महतोले बताइन् ।