डिभि परेर आएका नेपाली युवक अलपत्र, दूतावासले सहयोग गरेन

डिभी चिट्ठा परेर अमेरिका आएका कास्की ढिकुरपोखरीका खेम अधिकारी अमेरिकामा अलपत्र परेर सेल्टरमा पुगेका छन्। गएको अक्टोवर २३ मा अमेरिका पुगेका अधिकारी सामान्य अपांग हुन्। ‘एउटा आँखा राम्रोसँग देख्दिनँ। अलि शरीर कमजोर छ। त्यसैले कसैले सहयोग गरेनन्,’ सहयोगका लागि रूदै  अधिकारीले भने, ‘नेपाल फर्कौ भने पैसा छैन।’

गएको १२ दिनदेखि बाल्टिमोरको कोड ब्लु सेल्टरमा रहेका अधिकारीको उद्धारका लागि उनकी केस म्यानेजर स्यामान्सले नेपाली दूतावासमा समेत सम्पर्क गरेकी थिइन्। ‘तपाईँको दूतावासमा टेलिफोन सम्पर्क गरेकी थिएँ, फोन उठेन। म्यासेज छोडेकी थिए कुनै रेस्पोन्स आएन। सेल्टरभित्रको वातावरणले खेम आत्तिएको जस्तो देखिन्छन्। उनका लागि हामी सक्दो सहयोग जुटाउने काम गरिरहेका छौँ,’ स्यामान्सले भनिन्।

अक्टोवरमा न्युयोर्क पुगेका अधिकारीलाई एक जना नेपालीले पेन्सेल्भेनियाको आँगन रेष्टुरेन्टमा काम गर्न पठाएका थिए। ‘मैले काम गर्न सक्दैन भनेर हो कि सबैले पन्छाउने मात्र काम गरेँ,’ खेमले भने। गएको दुई महिनामा उनलाई नेपालीहरुले नै धेरै ठाउँमा बोलाए र निकाले। ‘बाल्टिमोर पुगेपछि एकजना नेपालीले सेल्टरमा जाने भनेर साेध्नु भयो। म धेरै अ‌ंग्रेजी बुझ्न सक्दिनँ। मैले जाने भने पछि उहाँले यतै ल्याएर राखिदिनु भयो।’