माघ २२,काठमाडौं । नेकपा एमालेका अध्यक्ष केपी शर्मा ओलीले हिउँ पर्ने बहानामा निर्वाचन दुई चरणमा गर्ने प्रस्ताव कुनै हालतमा स्वीकार्य नहुने स्पष्ट पारेका छन्। बुधबार झापा–काठमाडौं सम्पर्क मञ्चले आयोजना गरेको भेटघाट कार्यक्रमलाई सम्बोधन गर्दै अध्यक्ष ओलीले निर्वाचन तोकिएको मितिमै एकै चरणमा हुनुपर्ने बताए।
अध्यक्ष ओलीले काठमाडौं बाहिर मतदाता नामावली भएका पार्टी कार्यकर्तालाई समय निकालेर आफ्ना निर्वाचन क्षेत्रमा फर्कन निर्देशन दिएका छन्। निर्वाचनको माहोल बनाउँदै पार्टीको पक्षमा जनमत सिर्जना गर्न, आफन्त र साथीभाइसँग भेटघाट गर्न तथा पार्टी र नेतृत्वविरुद्ध फैलाइएका भ्रम चिर्न आग्रह गरे।
प्रधानमन्त्रीको उम्मेदवार भन्दै अनुभव नभएका व्यक्तिहरूले प्रचार गरिरहेको प्रसंगमा व्यंग्य गर्दै ओलीले देश चलाउने सोच, अनुभव र क्षमताविना नेतृत्व सम्भव नहुने बताए। उनले जहाजको उदाहरण दिँदै यात्रुले पाइलट बन्न खोजे जस्तै अनुभवहीन व्यक्तिले देशको नेतृत्व दाबी गर्नु जोखिमपूर्ण हुने टिप्पणी गरे।
निर्वाचन निष्पक्ष, धाँधलीरहित र भय–त्रास तथा प्रलोभनविनाको वातावरणमा हुनुपर्नेमा जोड दिँदै अध्यक्ष ओलीले मतपेटिका सुरक्षामा पार्टी प्रतिनिधिहरू सधैं सजग रहनुपर्ने बताए। एमालेले निर्वाचन शानदार रूपमा जित्ने दाबी गर्दै उनले कार्यकर्तालाई उच्च मनोबलका साथ प्रचार–प्रसारमा जुट्न निर्देशन दिए।
कार्यक्रममा पार्टीका सचिव एवं कोशी प्रदेशका मुख्यमन्त्री हिक्मत कार्की, पूर्वमन्त्री अग्नि खरेललगायत नेताहरूले पनि कार्यकर्तालाई निर्वाचन क्षेत्र केन्द्रित गतिविधिमा सक्रिय हुन आग्रह गरेका थिए।
