यस्तो अवस्थामा एमसीसीको पक्षमा उभिन कसैसँग नडराउन देउवाले नेता कार्यकर्तालाई निर्देशन दिएका छन् । ‘एमसीसी राष्ट्रको हितमा छ । कसैसँग डराउनुपर्दैन, एमसीसीको पक्षमा खुलेर लाग्नुपर्छ’, प्रधानमन्त्री देउवाले विहीबार बालुवाटारमै आयोजित कार्यक्रममा भनेका थिए ।

यसैबीच प्रधानमन्त्री देउवाको सचिवालयले एमसीसीबारे भ्रम निवाराणार्थ भन्दै ८ पृष्ठको ‘पर्चा’ सार्वजनिक गरेको छ । कुनै सरकारी निकायको छाप र आधिकारिकता नभएको ‘पर्चा’ विहीबार बालुवाटारबाटै वितरण गरिएको हो ।

सो पर्चालाई सरकारको आधिकारिक धारणाका रूपमा सार्वजनिक गर्न प्रधानमन्त्रीको सचिवालयले चाहेको छ । ‘अर्थमन्त्रालयले तयारी गरेको डकुमेन्ट हो । सजिलो होस् भनेर बालुवाटारबाटै बाँडिएको हो’, सो पर्चाबारे प्रधानमन्त्रीको सचिवालय स्रोतले भन्यो ।

कांग्रेस नेता अर्जुनरसिंह केसीको पुस्तक विमोचनमा प्रधानन्त्री देउवाले सरकारका कामहरूको सकरात्मक प्रचार नभएको गुनासो गरेलगत्तै केही पत्रकारहरूलाई सो ‘पर्चा’ बाँडिएको थियो । पर्चामा एमसीसीको पृष्ठभूमि, परिचय, संसदीय अनुमोदनको आवश्यकता र विवादित भनिएका विषयबारे स्पष्टीकरण दिइएको छ ।