कत्तिक ०४, काठमाडौँ । सरकारले अविरल बर्षाका कारण आएको बाढी–पहिरोबाट मृत्यु भएका परिवारलाई तत्काल आर्थिक सहयोग दिने घोषणा गरेको छ । मन्त्रिपरिषद्को बुधबार बसेको बैठकले बाढी–पहिरोका कारण मृत्यु भएकाका परिवारलाई २ देखि ४ लाखसम्म आर्थिक सहयोग दिने निर्णय गरेको हो ।

बैठकले एकै घरमा एक जनाको मृत्यु भएको भएमा २ लाख, २ जनाको भए ३ लाख र ३ जनाको मृत्यु भएको भएमा ४ लाख दिने निर्णय गरेको छ । बैठकपछि संघीय मामिला तथा सामान्य प्रशासनमन्त्री राजेन्द्र श्रेष्ठले मन्त्रिपरिषद्को बैठकले मृतकका परिवारलाई राहत उपलब्ध गराउने निर्णय भएको जानकारी दिए । बैठकले बाढी–पहिरोमा परी घाइते भएकाहरुको निःशुल्क उपचार गर्ने निर्णय पनि गरेको छ । मन्त्रिपरिषद् बैठकले राहत र उद्धारको कार्यलाई प्रभावकारी ढंगले अघि बढाउने निर्णय गर्दैै राज्यका सबै संयन्त्र परिचालन गर्न समेत निर्देशन दिएको छ ।

त्यसै गरी, सरकारले बाढी–पहिरोबाट घर भत्केकाहरूको घर निर्माणका लागि ५ लाख रुपियाँसम्म आर्थिक सहयोग उपलब्ध गराउने निर्णय गरेको छ । मन्त्रिपरिषद् बैठकको निर्णयअनुसार पहाडमा घर बनाउन ४ लाख, हिमालमा ५ लाख र तराईमा ३ लाख रुपियाँ उपलब्ध गराउने निर्णय भएको गृहमन्त्री बालकृष्ण खाँणले जानकारी दिए । सरकारले घर निर्माणका लाथि जग्गाको अभाव हुनेका लागि थप ३ लाख पनि उपलब्ध गराउने भएको छ ।

घर भत्केकालाई तत्काल ५० हजार दिने निर्णय

राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकले अविरल बर्षासँग आएको बाढी–पहिरोमा परी घर भत्किएका परिवारलाई तत्काल ५० हजार रुपियाँ उपलब्ध गराउने निर्णय गरेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले तत्काल बासको व्यवस्थापन गर्नका लागि सरकारले घर भत्किएका र बगाएका परिवारलाई ५० हजारको दरले राहत दिने निर्णय गरेको जानकारी दिनुभयोे । हालसम्म विभिन्न जिल्लामा झन्डै २० भन्दा बढी घर भत्केको तथ्यांक प्राप्त भएको जानकारी दिँदै उहाँले उद्धार र राहतका लागि राज्यका सम्पूर्ण संयन्त्र परिचालन गर्ने निर्णय भएको पनि बताए ।

बाढी–पहिरोबाट कृषि बालीलगायतका क्षतिका सन्दर्भमा आवश्यक अध्ययन गरेर त्यसका आधारमा क्षतिपूर्ति दिने निर्णय भएको बताउँदै उनले त्यसका लागि कृषि मन्त्रालयको संयोजकत्वमा देशभर भएका क्षतिको लगत संकलन गरिने भएको छ ।

प्रधानमन्त्री पनि बाढी–पहिरो प्रभावित क्षेत्रको अवलोकनमा जाने तय भएको बताउँदै पोखरेलले प्राधिकरणको पछिल्लो तथ्यांकअनुसार देशभर बाढी–पहिरोबाट ५० जनाको मृत्यु भएको छ भने ३९ जना बेपत्ता छन् ।