बिहीबार बिहानै बालुवाटारमा कांग्रेस सभापतिसमेत रहेका प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एमाले (समाजवादी) पार्टीका संयोजक माधवकुमार नेपालबीच भएको छलफलमा सरकार विस्तारबारे अझै दुई साता कुर्ने समझदारी बनेको हो ।
निर्वाचन आयोगले एमाले (समाजवादी) को आधिकारिकताबारे छिनोफानो नगरी मन्त्रिपरिषद्लाई पूर्णता दिँदा पछि समस्या हुन सक्ने भएकाले यस्तो समझदारी गरिएको बताइएको छ ।
बिहीबार नै काठमाडौंमा भएको एक कार्यक्रममा माओवादी केन्द्रका अध्यक्ष प्रचण्डले नेता नेपालको नयाँ पार्टीले आधिकारिकता पाएलगत्तै मन्त्रिपरिषद् विस्तार हुने खुलासा गरेका छन् । मन्त्रिपरिषद् विस्तार गर्न ढिला गर्न नहुने विषयमा समझदारी बनेको जानकारी दिँदै उनले भने– ‘दर्ता भएको पार्टीको सनाखत हुनेबित्तिकै एकै दिनमा मन्त्रिपरिषद्को टुंगो लाग्छ ।’ नेपाल समाचारपत्र दैनिकबाट
