काठमाडौँ, १५साउन । नेकपा एमालेका अध्यक्ष केपी शर्मा ओलीले पार्टीमा जारी विवादलाई तत्काल वारपार गर्न निर्देशन दिनुभएको छ । पार्टी कार्यालयमा पुगेर महासचिव इश्वर पोख्रेललाई शनिवार बिहान आम कार्यकर्ताले पार्टी मिल्यो वा फूट्यो भन्ने स्पष्ट सन्देश पाउने गरी काम गर्न निर्देशन दिनुभएको स्रोतले जनाएको छ ।
पार्टीमा सहमतिका नाममा कुनै पनि निर्णय हुन नसक्दा सबै कमिटी र कार्यकर्ता क्रोनिक हुँदै गएको निष्कर्ष निकाल्दै अध्यक्ष ओलीले अब दुईदिनभित्र सबै बिषय टुंगो लगाउन निर्देशन दिनुभएको हो ।
एमाले संसदीय दलका उपनेता सुवासचन्द्र नेम्वाङले आफूहरु सहमतिकै लागि लागिपरिरहेको बताउनुभएको छ । उहाँले भन्नुभयो, ‘जतिसक्दो चाँडो पार्टीका विवाद समाधान गरौं भनेर हामी दुवै पक्षका साथीहरु छलफलमै छौं । अब एक दुईदिन मै जे हुने हो हुन्छ । कि एकै ठाउँ भइन्छ । एकै ठाउँ हुन नसक्ने साथीहरु बाटो लाग्नुहुन्छ ।’
