चरीकोट, जेठ १९ गते । दोलखाको बिगु गाउँपालिका–१, लामाबगरमा निर्माणाधीन ४५६ मेगावाट क्षमताको माथिल्लो तामाकोसी जलविद्युत् आयोजनाले दुई हप्तापछि विद्युत् परीक्षण प्रसारण गर्ने तयारी गरेको छ । आयोजनाका प्रवक्ता डा. गणेश न्यौपानेले मुख्य संरचनाहरूको प्राविधिक परीक्षण गरिसकएकाले दुई हप्तापछि विद्युत् परीक्षण प्रसारण गर्ने तयारी गरिएको जानकारी दिनुभयो ।
उहाँका अनुसार आयोजनाका जोखिम तथा चुनौतीपूर्ण मानिएका ३७३ मिटर अग्लो तल्लो मुख्य पाइप र ३१० मिटर अग्लो माथिल्लो मुख्य पाइप र साँघुरो पाइप जोड्ने करिब सय मिटर तेर्सो मुख्य पाइपको प्राविधिक परीक्षण सफल भएको छ ।
पावर हाउसका पाँच युनिटमध्ये एकको प्राविधिक परीक्षण सफल भएको छ । अब पावर हाउसका पाँचवटा युनिट र सुरुङ अडिट गेटको प्राविधिक परीक्षण थालिएको छ । यिनको प्राविधिक परीक्षण सकिएपछि विद्युत् परीक्षण प्रसारण गरिन्छ । यी संरचनामा पानी पठाउँदै परीक्षण गर्दै पानी सुकाएर हेर्नुपर्ने हुनाले समय लागेको हो ।
असार महिनासम्ममा दुईवटा युनिटबाट विद्युत् उत्पादन गर्न सकिने देखिएको जानकारी दिँदै प्रवक्ता डा. न्यौपानेले भन्नुभयो, “आयोजनाको सबैभन्दा संवेदनशील र चुनौतीपूर्ण मानिएको ८२२ मिटरको वाटरहेड धान्ने मेनसट अफ भल्भ तथा छवटा युनिटमा जडान गरिएका मेन इन्लेट भल्भहरूको प्राविधिक परीक्षण सफलतापूर्वक सम्पन्न भएको छ । एक युनिटबाट ७६ मेगावाट विद्युत् उत्पादन हुन्छ । ”