इराकमा एक सयको मृत्यु, ४ हजार घाइते !

बगदाद । संयुक्त राष्ट्र संघले इराकमा सरकारविरुद्ध भएको प्रदर्शनका क्रममा करिब १०० जनाको मृत्यु भएपछि यसरी  अविवेकी हिसाबले जीवन गुमाउने अवस्थाको अन्त्य गर्न आग्रह गरेको छ । 

प्रदर्शनकारीले आफूले बेरोजगारी, कमजोर सार्वजनिक सेवा र भ्रष्टाचारको विरुद्धमा आन्दोलन गरेको जनाउँदै आएका छन् । इराकका लागि संयुक्त राष्ट्र संघको सहयोगी मिसनका प्रमुख जीनिन् हेन्नीज प्लास्चाएर्टले मानिसको ज्यान जाने अवस्था ल्याउनका लागि जिम्बेवारलाई कानुनी कारवाही हुनुपर्ने जनाएकी छन् ।

५ दिन यताको मृत्यु र घाइतेको अवस्थामा चिन्ता व्यक्त गर्दै यसलाई तत्काल रोक्नुपर्ने राष्ट्र संघका प्रतिनिधिले बताएकी छन् । शनिबार सुरक्षा बलले पूर्वी बगदादको एउटा प्रदर्शनमा हस्तक्षेप गरेको थियो ।

राजधानीमा पछिल्लो पटक भएको प्रदर्शनमा ५ जनाको मृत्यु भएको थियो । इराकको मानवअधिकार सम्बन्धी संसदीय समितिले कम्तिमा ९९ जना मानिसको मृत्यु भएको र झण्डै ४ हजार घाइते भएको जनाएको छ । – (बीबीसी)