एजेन्सी । विश्वकप क्वार्टरफाइनल अन्र्तगत फ्रान्स र उरुग्वेको खेल रोचक मोडमा पुगीरहेका बेला फ्रान्सले गोल संख्या दोब्बर पारेको छ । यसअघि ४० मिनेटमा गोल गरेर खाता खोलेको फ्रान्सले खेलको ६१ औँ मिनेटमा गोल गरेको हो । फ्रान्सका लागी एन्टोनी ग्रिजमेनले फ्रान्सका लागी दोस्रो गोल गरेका हुन् ।
रसिया विश्वकपमा चारै खेल जितेको उरुग्वेले ७ गोल गरेको थियो भने एक गोलमात्रै खाएको थियो । एक खेल बराबरी खेलेको फ्रान्सले भने ७ गोल गरेर ४ गोल खाएको थियो । गोलका लागि उरुग्वेले विपक्षीको पोस्टको दिशामा ३७ प्रहार गरेको थियो भने फ्रान्सले ३८ प्रहार गरेको थियो ।
त्यसका लागि उरुग्वेले १ हजार ८ सय ५९ पास सही खेलेको थियो भने फ्रान्सले १ हजार ९ सय ४ पास खेलेको थियो । बल क्रस गर्ने कुरामा पनि दुवै टिम उस्तै देखिएका छन् । उरुग्वेले चार खेलमा ५६ क्रस गरेको थियो भने फ्रान्सले ५८ क्रस गरेको थियो ।
फाउलमा भने फ्रान्स अगाडि रहेकाले उरुग्वे टिम जोगिएर खेल्नुपर्ने देखिन्छ । चार खेलमा फ्रान्सले ५८ फाउल गरेको थियो भने उरुग्वे ४६ फाउल गरेको थियो । समूह चरणका तीन र अन्तिम १६ को एक खेलमा गरी उरुग्वेले विपक्षीको ३९ सट प्रहारको सामना गरेको थियो भने फ्रान्सले ३१ सटको सामना गरेको थियो ।
आजको खेलमा क्लब फुटबलका स्टारहरु एउटै मैदानमा भिडेको दर्शकहरु निकै महत्वका साथ हेरिरहेका छन् । खेल इडिसन काभानीमा सुरु भएको हो । बलियो डिफेन्स लाइन भएको उरुग्वेविरुद्ध सम्हालिएर खेल्ने रणनीति प्रशिक्षक डेसच्याम्प्सको छ । उरुग्वेका लागि फ्रान्सविरुद्धको खेल सहज छैन । अन्तिम १६ को खेलमा पोर्चुगलविरुद्ध खेल्दा दुई गोल गरेका काभानी चोटका कारण बाहिरिएका थिए ।
उरुग्वे र फ्रान्सबीच समग्रमा यसअघि आठ पटक खेल भएका छन् । जसमा उरुग्वे तीन खेलमा र फ्रान्स एक खेलमा विजयी भएका थिए । चार खेल बराबरी भएको थियो । जसमा उरुग्वेले फ्रान्सविरुद्ध आठ गोल गरेको छ भने चार गोल खाएको छ ।
उरुग्वे र फ्रान्स विश्वकपमा चौथो पटक खेल्न लागेका भए पनि नकआउट चरणमा पहिलो पटक भेटिएका हुन् । सन् २००२ र २०१० मा विश्वकप समूह चरणमा भएको भेटमा गोलरहित बराबरी भएको थियो ।
त्यसअघि विश्वकपमै सन् १९६६ मा भएको खेलमा उरुग्वे २—१ ले विजयी भएको थियो । पछिल्लो पटक सन् २०१३ मा भएको मैत्रीपूर्ण खेलमा पनि उरुग्वे १—० ले विजयी भएको थियो । जसमा लुइस स्वारेजले गोल गरेका थिए ।
फ्रान्स पनि सन् २००६ पछि विश्वकप सेमिफाइनलमा पुगेको छैन । त्यसबेला फ्रान्स फाइनलमा इटालीसँग पराजित भएको थियो । सन् १९९८ को विश्व विजेता फ्रान्स सबै गरेर पाँच पटक विश्वकप सेमिफाइनल पुगेको छ । फ्रान्स पछिल्लो पटक २०१४ मै क्वार्टरफाइनलमा जर्मनीसँग पराजित भएको थियो ।
फ्रान्सले उरुग्वेलाई जितेको एकमात्र खेल सन् १९८५ मा भएको हो । घरेलु मैदानमै भएको मैत्रीपूर्ण खेलमा त्यसबेला फ्रान्स २—० ले विजयी भएको थियो । यसपटक विश्वकपमा लगातार चार खेल जितेको उरुग्वेले फ्रान्सलाई हराउन सके लगातार पाँच खेल जितेर राष्ट्रिय कीर्तिमान बनाउने छ ।
उरुग्वेले विश्वकपमा लगातार चार खेल जितेको यसअघि सन् १९३० मा हो । फ्रान्सलाई हराए उरुग्वे समग्रमा छैठौं पटक विश्वकप सेमिफाइनलमा पुग्नेछ । सन् १९३० र १९५० को विश्व विजेता उरुग्वे पछिल्लो पटक सन् २०१० मा घानालाई हराएर सेमिफाइनल पुगेको थियो ।
त्यसअघि उरुग्वेले क्वार्टरफाइनल खेल जितेको सन् १९७० मा हो । जतिबेला उरुग्वेले सोभियन युनियनलाई १—० ले हराएको थियो । साथै उरुग्वे क्वार्टरफाइनलमा पुगेर हारेको पछिल्लो पटक सन् १९६६ मा हो । त्यसबेला पश्चिम जर्मनीसँग ४—० ले हारेको थियो ।
फ्रान्सका प्रशिक्षक डिडिएर डेसच्याम्प्स यदि काभानी खेले भने मैले हाम्रो टिमलाई केही फरक बनाउनु बताएका थिए । उनी खेल्छन् कि खेल्दैनन् खेल सुरु हुने ९० मिनेट अघि मात्रै हामीलाई थाहा हुने उनको भनाई थियो ।
उरुग्वेका प्रशिक्षक ओस्कार तबरेजले फ्रान्सको बलियो पक्ष बल आक्रमण गर्ने देखिएको बताएका छन् । ग्रिजम्यान र एमबाप्पे राम्रो लयमा छन् । उनीहरुलाई रोक्ने र गोल गर्ने हाम्रो प्रमुख योजना हुने छ । हामीले उनीहरुलाई बल बढाउने ठाउँ दिनु हुँदैन । उनीहरुले बल बढाए भने हाम्रो लागि खतरा हुने छ ।
