भक्तपुरमा अन्तर्राष्ट्रियस्तरको रंगशाला निर्माण सुरु नहुँदै विवाद , संसदमा चल्यो बहस

भक्तपुरको सूर्यविनायक नगरपालिकामा बनाउने भनिएको अन्तर्राष्ट्रियस्तरको रंगशाला निर्माण नहुँदै विवादमा मुछिएको छ ।  नेपाल मजदुर किसान पार्टीका सांसद प्रेम सुवालले संसदमा सरकारले भक्तपरमा अन्तर्राष्ट्रिय रंगशाला निर्माण गर्नका लागि रोकेको जग्गाप्रति आपत्ति जनाउँदै यसबाट ५०–६० हजार जनता विस्थापित हुने बताएका छन् । 

बिहीबार संसदमा बोल्दै सांसद सुवालले भक्तपुरको सूर्यविनायक नगरपालिकामा अन्तर्राष्ट्रिय स्तरको रंगशाला निर्माणको लागि सरकारले रोकेको जग्गाप्रति विरोध जनाएका हुन् । 

उनले भने, “सरकारले भक्तपुरको सिपाडोल, नङखेल, चित्तपोल, ताथली र सुडाल क्षेत्रमा जग्गा एकीकरण आवास योजना सञ्चालन गरी प्राप्त हुने १५००–२००० रोपनी भन्दा बढी जग्गामा अन्तर्राष्ट्रिय स्तरको रंगशाला बनाउने समाचार छ । काठमाडौं उपत्यका र भक्तपुरमा त्यति खुल्ला क्षेत्र छैन । यसले कृषिमा आधारित ५०–६० हजार जनतालाई विस्थापित गराउने र खाद्यान्न संकट तथा बेरोजगारी समस्या नित्याउने छ । यो कदम हिटलरको यहुदी जाति विरुद्ध सफाइ आन्दोलन चलाए जस्तै हुनेछ ।” 

उनले थपे “फासिवाद समाजवाद होइन । अन्तर्राष्ट्रिय स्तरको रंगशाला निर्माण प्रदेश ३ को राजधानी भएको मकवानपुरमा बनाउनु उपयुक्त हुनेछ । काठमाडौं उपत्यकामा यति धेरै जग्गा छैन ।”

युवा तथा खेलुकद मन्त्रालय तथा राष्ट्रिय खेलकुद परिषद्ले लामो समय लगाएर भक्तपुरको सूर्यविनायक नगरपालिकाको ८, ९ र १० नम्बर वडामा जग्गाको पहिचान गरेको थियो । अहिले त्यस स्थानमा सरकारले रंगशाला निर्माण गर्नका लागि जग्गा रोक्का समेत गरेको तर निर्माण हुने भनिएको ठूलो अन्तर्राष्ट्रिय रंगशालाको प्रारम्भिक कार्य अघि नबढ्दै विवाद सुरु भएको छ । संसदमै बहस चलेपछि रंगशाला निर्माणमा अन्योल छाउने निश्चित छ ।