२०७४ माघ ९

काठमाडौं । नेकपा एमालेले एमाले सांसद तथा पूर्व डीआईजी नवराज सिलवालको विषय अतिरञ्जित नगर्न चेतावनी दिएको छ ।

एमाले स्थायी कमिटीको सोमबार अध्यक्ष केपी शर्मा ओलीको निवासमा बसेको बैठकले यस्तो चेतावनी दिएको हो ।

“ललितपुर– क्षेत्र नं १ बाट नेकपा (एमाले) का तर्फबाट प्रतिनिधिसभा सदस्यका रुपमा निर्वाचित नवराज सिलवालविरुद्ध नेपाल प्रहरीको आग्रहमा इन्टरपोलले ‘डिफ्युजन नोटिस’ जारी गरेको भनी प्रकाशित समाचारप्रति बैठकको गंभीर ध्यानाकर्षण भएको छ,” बैठकपछि एमाले सचिव प्रदीप ज्ञवालीले जारी गरेको विज्ञप्तिमा उल्लेख छ, “इन्टरपोललाई समेत अतिरञ्जित सूचना दिई भइरहेका यस्ता क्रियाकलापले जनताको अभिमतलाई अपमानित गरेको र नवनिर्वाचित जनप्रतिनिधिविरुद्ध भइरहेका यी गतिविधिहरु पूर्वाग्रह र प्रतिशोधबाट निर्देशित छन् भन्ने निष्कर्षसहित बैठकले सरकारलाई यस्ता गतिविधि बन्द गर्न ध्यानाकर्षण गरेको छ ।”
प्रहरीले सिलवाल बोलाउँदा पनि नआएको भन्दै उनको नाममा डिफ्युजन नोटिस जारी गरेको थियो । त्यसको भोलिपल्टै बसेको एमाले स्याथी कमिटी बैठकले यस्तो निर्णय गरेको हो ।