एसीसी यु–१९ एसिया कपको उपाधि अफगानिस्तानलाई

मङ्सिर ३,काठमाडौं : अफगानिस्तानले इतिहास रच्दै पहिलो पटक एसीसी यु–१९ एसिया कपको उपाधि जितेको छ । आइतबार सम्पन्न फाइनल खेलमा पाकिस्तानलाई १८५ रनको भारी अन्तरले पराजित गर्दै अफगानिस्तानले उपाधि उचालेको हो ।

किनरारा ओभलमा २४९ रनको चुनौति पछ्याउँदै ब्याटिङ गरेको पाकिस्तानले २२.१ ओभरमा अलआउट हँुदै ६३ रनमात्रै बनाउन सकेपछि अफगानिस्तानले उपाधि रक्षा गरेको हो । अफगानिस्तानलाई जित दिलाउनका लागि मुजिब उर रहमानले उत्कृष्ट बलिङ गर्दै ५ विकेट लिए । उनले सेमिफाइनलमा नेपालविरुद्ध पनि ६ विकेट लिएका थिए । 

पाकिस्तानका कुनै पनि खेलाडीले अफगानिस्तान विरुद्ध राम्रो ब्याटिङ गर्न सकेनन् । पाकिस्तानका मोहम्मद थाहाले १९ रन बनाउन बाहेक अन्य खेलाडी सस्तैमा आउट भए ।

यसअघि पहिले टस हारेर ब्याटिङ गरेको अफगानिस्तानले उत्कृष्ट ब्याटिङ गर्दै निर्धारित ५० ओभरमा ७ विकेटको क्षतिमा २४८ रन बनाएको थियो । अफगानिस्तानका लागि इक्रम अलि खिलले नटआउट शतकीय पारी खेले । उनले ११३ बललमा १० चौका र २ छक्काको मद्दतमा १०७ रन बनाए । त्यस्तै, रहमानउल्लाह गुर्बाजले ४० र इब्राहिम जाद्रनले ३६ रन बनाएका थिए ।

यसअघि समूह चरणको आफ्नो पहिलो खेलमा अफगानिस्तानले पाकिस्तालाई ७ विकेटले जितेको थियो । यो खेलमा पनि पाकिस्तानलाई अफगानिस्तानले ५७ रनमा अलआउट गरेको थियो । सेमिफाइनलमा नेपाललाई पराजित गर्दै अफगानिस्तान सेमिफाइनलमा प्रवेश गरेको टिम हो ।