रियाद मेहरेज लिसेस्टर क्लव छाड्दै

१७ जेठ, काठमाडौं । लिसेस्टर सिटीका स्ट्राइकस रियाद मेहरेजले क्लव छाड्न चाहेको घोषणा गरेका छन् ।

फ्रान्सेली क्लव ले हाब्रेबाट सन् २०१४ मा ४ लाख पाउण्डमा लिसेस्टर आएका उनी गत सिजन क्लवले पि्रमियर लिगको उपाधि जितेलगत्तै छाड्ने मुडमा थिए । तर क्लव प्रशासनले गरेको बिशेष अनुरोध स्वीकार्दै उनी एक सिजनका लागि क्लवमा बसेका थिए ।

तर मेहरेजले आफ्नो बिज्ञप्तिमा भनेका छन् कि उनी निक्कै महत्वाकांक्षी छन् र क्लवलाई आफूले यस सिजनदेखि छाड्न लागेको सूचित गरिसकेका छन् ।

प्रोफेसनल प्लेयर अफ द इयर २०१६ को उपाधि जितेका मेहरेजले यस सिजन लिसेस्टरका लागि ४८ खेल खेले । क्लवले कमजोर प्रदर्शन गर्दै लिगमा १२औं स्थान र च्याम्पियन्स लिगको क्वार्टरफाइनलसम्म पुग्दा मेहरेजको योगदान १० गोल र ७ असिस्ट हो ।

मेहरेजले एक बिज्ञप्तिमाा भनेका छन्, ‘मैले लिसेस्टरबाट ठूलो प्रशंसा र सम्मान पाएँ र मैले पनि पूरै इमान्दारी र पारदर्शी ढंगले योगदान दिएँ । मैले क्लवलाई यो सूचित गरिसकेको छु कि अव मलाई अघि बढ्ने समय आइसकेको छ ।’

‘मैले क्लवका अध्यक्षसँग पछिल्लो बर्ष घनिभूत छलफल गरेको थिएँ र एक सिजन क्लवमै रहन सहमति गरेको थिए, किनभने, म लिसेस्टरमै रहेर च्याम्पियन्स लिगको उपाधि पनि जित्न चाहन्थेँ ।’

‘मैले मेरो करिअरको सबैभन्दा उत्कृष्ट चार सिजन लिसेस्टरका लागि बिताएको छु र हरेक पल स्मरणीय पनि छ । गर्व गर्न लायक के पनि भयो भने मेरै समयमा क्लवले पि्रमियर लिगमा एतिहासिक उपलब्धि हासिल गर्‍यो ।’