संविधान संशोधन प्रस्ताव अघि बढाउने सरकारको तयारी

काठमाडौं– सरकारले संसदमा पेश गरिएको संविधान संशोधन प्रस्ताव अघि बढाउने तयारी गरेको छ ।
कानुन मन्त्री अजयशंकर नायकले स्थानीय तहको निर्वाचन सम्पन्न गराउन पनि भोली बस्ने संसद बैठकमा संविधान संशोधन प्रस्ताव अघि बढाउनैपर्ने बताए ।
व्यवस्थापिका संसद कार्य व्यवस्था परामर्श समितिको बैठक पछि संचारकर्मीसँग कुरा गर्दै उनले भोली बस्ने संसद बैठकमा प्रमुख प्रतिपक्ष एमालेले पनि संविधान संशोधन प्रस्ताव अघि बढाउन साथ दिने जिकीर समेत गरे ।

कानुन मन्त्री नायकले निर्वाचनमा सबै दललाई सहभागी गराउन पनि संविधान संशोधन प्रस्ताव अघि बढाउन सरकार बाध्य भएको पनि स्पष्ट पारे ।
यता, प्रमुख प्रतिपक्ष नेकपा एमालेका वरिष्ठ नेता माधवकुमार नेपालले भने संविधान संशोधन प्रस्ताव अघि बढाउन नदिने पार्टीको अडान यथावत रहेको टिप्पणी गरे ।
उनले संविधान संशोधन प्रस्तावमा अघि सारिएका बूदा राष्ट्रहितमा नरहेकाले एमालेले त्यसलाई स्विकार गर्न नसक्ने पनि स्पष्ट पारे । नेता नेपालले संविधान संशोधन प्रस्तावको विपक्षमा सत्तारुढ दलहरु आफैं उभिएको पनि स्मरण गराए ।
तराई मधेश सदभावना पार्टीका अध्यक्ष महेन्द्रराय यादवले निर्वाचन हुनै नसक्ने जिकीर गरे ।
उनले सरकारले हुनै नसक्ने निर्वाचनको मिति घोषणा गरेको प्रतिक्रिया दिए । उनले संविधान संशोधन प्रस्ताव परिमार्जनसहित पारित नभई निर्वाचन हुनै नदिने उल्लेख गरे ।
संयुक्त लोकतान्त्रिक मधेशी मोर्चाले सरकारले स्थानीय तहको निर्वाचनको मिति घोषणा गरेलगत्तै मधेश केन्द्रित विरोध प्रर्दशनको कार्यक्रम घोषणा गरिसकेको छ ।