ट्रम्पलाई अदालतको अहिलेसम्मकै सबैभन्दा ठूलो झट्का, तर ट्रम्प पछि नहट्ने

वासिंगटन, २३ माघ । अमेरिकी राष्ट्रपति डोनाल्ड ट्रम्पलाई अदालतले अर्को झट्का दिएको छ । सात मुस्लिम बहुल देशका नागरिकलाई अमेरिका जान लगाएको प्रतिबन्ध लगाउने राष्ट्रपति ट्रम्पको निर्णयलाई सिएटल अदालतले अस्थायी रोक लगाइदिएको छ ।

अमेरिकी राज्यले ट्रम्पको कार्यकारी निर्णयविरुद्ध अदालतले आदेश दिन नसक्ने सरकारी वकिलको दावीलाई सिएटल अदालतले खारेज गरिदिएको हो । ट्रम्प प्रशासनका लागि यो अहिलेसम्मको सबैभन्दा ठूलो कानुनी झट्का हो ।

बोस्टनको एक अदालतले फैसला सुनाएको भोलिपल्टै वासिंगटन राज्यमा ट्रम्पको निर्णयविरुद्ध आदेश आएको हो । वासिंगटनमा सुनाइएको यो आदेशले देशभरी प्रभाव पार्ने जनाइएको छ ।

अमेरिकी विदेश विभाग र गृहमन्त्रालयले यसै समयमा कानुनी विशेषज्ञसँग अमेरिकाले रद्ध गरेका ६० हजारभन्दा बढी रद्द गरिएका भिजामाथि कस्तो कदम चाल्ने भन्ने विषयमा छलफल गरिरहेको छ । अमेरिकी सञ्चारमाध्यमले कस्टम र आप्रावसी अधिकारीले सबै एयरलाईन्ससँग ट्रम्पको घोषणा जारी हुनुअघिको सामान्य स्थिति बहाल गर्ने बारेमा कुराकानी भइरहेको बताइएको छ ।

ह्वाइट हाउसले एक विज्ञप्ति जारी गर्दै न्याय विभागले जतिसक्दो छिटो अदालतको यो फैसला रोक्नका लागि अपिल हाल्ने जनाएको छ । विज्ञप्तिमा दाबी गरिएको छ, ‘राष्ट्रपतिको यो आदेश कानुनी रुपमा पनि सही र उचित हो । उनको यो आदेश देशको सुरक्षाका लागि हो र अमेरिकी जनताको सुरक्षा उसको ंसंवैधानिक अधिकार हो । ट्रम्प प्रशासनका लागि यो ठूलो चुनौती पनि हो । अमेरिकी अधिकारीहरुले ट्रम्पको कार्यकारी आदेशको एक सातामा नै ६० हजारभन्दा बढीको भिषा सद्द गरिसकिएको जनाएको छ ।

ट्रम्पले अघिल्लो साता अमेरिकामा शरणार्थीको संख्या कम गर्ने तर्क दिँदै अमेरिका प्रवेशमा १ सय २० दिनसम्मका लागि रोक लगाउने आदेश दिए । यसका साथै सिरियाली शरणार्थीलाई अमेरिका प्रवेशमा अनिश्चितकालीन रोक लागेको थियो । सिरिया, यमन, इराक, इरान, लिबिया, सोमालिया र सुडानका आप्रवासीलाई अमेरिका प्रवेशमा रोक लगाइएको हो । ट्रम्पको यो निर्णयका विरुद्ध वासिंगटन र मिनेसोटामा अदालतमा मुद्दा दर्ता भएको थियो । वासिंगटन राज्यका महान्यायधिवक्ता बब फर्गुसनले यो प्रतिबन्ध गैरकानुनी र असंवैधानिक भएको बताएका छन् । ट्रम्प प्रशासनले भने यो प्रतिबन्ध अमेरिकालाई सुरक्षित राख्नका लागि गरिएको जनाएको छ । नीतिहरुलाई चुस्त दुरुस्त बनाएर पुनः सुचारु बनाउने ट्रम्पको भनाई छ ।

ट्रम्पले यसलाई मुस्लिममाथिको प्रतिबन्धका रुपमा नबुझ्न आग्रह गरेको भएपनि केही अमेरिकी भिषाबाहकसमेत अमेरिका फर्किन पाएका छैनन् । यसैबीच नर्वेका पूर्वप्रधानमन्त्रीले आफूलाई यसैसाता अमेरिकी एयरपोर्टमा रोक लगाइएको जनाएका छन् । उनको भिषा इरानी थियो ।

प्रतिबन्ध कायम रहने प्रतिज्ञा

अमेरिकी राष्ट्रपति डोनाल्ड ट्रम्पले अमेरिका प्रवेशमा ७ मुस्लिम बहुल देशका नागरिकमाथि लगाएको प्रतिबन्ध कायम राख्ने प्रतिबद्धता जनाएका छन् । उनले ट्रम्प प्रशासनको निर्णयविद्ध आएको फैसलालाई हास्यास्पद भएको टिप्पणी गर्दै यसलाई नमान्ने बताएका हुन् । न्यायधीस जेम्स रोबर्टले ट्रम्पको कदमलाई असंवैधानिक भएको बताएका थिए ।

६० हजार बढीको भिषा रद्द

अमेरिकी राष्ट्रपतिले अघिल्लो सात मुस्मिल बहुल देशका आप्रवासीमाथि लगाएको रोकपछि हालसम्म ६० हजारभन्दा बढीको भिषा रद्द भएको जनाइएको छ । अमेरिकी सरकारी एक कानुन व्यवसायीले ट्रम्प अमेरिकी राष्ट्रपतिमा निर्वाचित भएदेखि यतामात्रै अमेरिका प्रवेश गर्ने १ लाखको भिषा रद्द भएको जनाएका छन् ।

एक साताअघि इरान, इराक, सिरिया, लिबिया, सोमालिया, सुडान र यमनका नागरिकलाई अमेरिका प्रवेशमा रोक लगाउने आदेशपछि मात्रै ६० हजारको भिषा रद्द भएको अमेरिकी कन्सुलर विभागका प्रवक्ता विल कक्सले जनाएका छन् ।

अमेरिका प्रवेशमा रोक लगाइएको ९० दिनमा अमेरिकी प्रशासनले भिषा प्रणालीबारे अध्ययन गर्ने जनाइएको छ । अमेरिकामा नै यो प्रतिबन्धको विरोध हुँदै आएको छ भने राष्ट्रसंघ सहित अन्तर्राष्ट्रिय समुदाय समेत ट्रम्प प्रशासनको निर्णयदेखि असन्तुष्ट रहेका छन् । ट्रम्पको आप्रवासीसम्बन्धि कार्यकारी आदेशपछि मात्रै १ सय ९ जनालाई अमेरिका नियन्त्रणमा लिइएको छ