फागुन १,काठमाडौं । प्रगतिशील लोकतान्त्रिक पार्टीका नेता जनार्दन शर्माले तत्कालीन माओवादी केन्द्रभित्र आफ्नो आवाज सुन्ने अवस्था नरहेको दाबी गरेका छन्। रुकुम पश्चिममा जारी चुनावी अभियानका क्रममा आयोजित पार्टी कार्यक्रममा बोल्दै शर्माले माओवादी १२० सिटबाट खुम्चिँदै २–३ सिट जित्ने अवस्थामा पुगेपछि पार्टी विघटनतर्फ गएको आरोप लगाए। जनयुद्धमा सहभागी भई सामन्ती उत्पीडनविरुद्ध विद्रोहमा उत्रिएका व्यक्तिहरूको योगदान स्मरण गर्दै उनले जनयुद्धले तयार पारेको आधारमै दोस्रो जनआन्दोलन सफल भई राजतन्त्रको अन्त्य र संघीय लोकतान्त्रिक गणतन्त्रको स्थापना सम्भव भएको बताए।
उनका अनुसार त्यस आन्दोलनबाट संविधानसभा गठन, संघीय लोकतान्त्रिक गणतन्त्रको निर्वाचन, समावेशी र सहभागितामूलक समाजवाद उन्मुख अर्थतन्त्रको अवधारणा, सामाजिक न्याय, दलितमाथिको छुवाछुतविरुद्ध समान अधिकार, महिलाको समावेशिता तथा अधिकार, गरिब, आदिवासी जनजाति र अल्पसंख्यक समुदायका अधिकारहरू संविधानमा सुनिश्चित गर्न सफल भएको थियो। उनले यी उपलब्धिलाई ऐतिहासिक भन्दै, त्यसलाई उपयोग गर्ने क्रममा पार्टी र नेताहरूले अवसर गुमाएकै कारण आज ती उपलब्धिहरू कमजोर बनेको टिप्पणी गरे।
शर्माले भने, “त्यो संविधान आज मूर्च्छित अवस्थामा छ, कोमामा छ। नेताहरूले यसको गहिरो समीक्षा, आत्मालोचना र पश्चात्ताप गर्नुपर्ने थियो।” उनका अनुसार तत्कालीन माओवादी नेतृत्वले जनजीविकाका सवाल र जनताको एजेन्डा छाड्दै उल्टो बाटो समातेपछि पार्टी पतनतर्फ धकेलियो।
उनले दुःख व्यक्त गर्दै भने, “माओवादी पार्टी विघटन भयो, आज माओवादी पार्टी छैन। नेताहरू नयाँ पार्टी निर्माणतर्फ गएका छन्। पछिल्लो आन्दोलनले नेतृत्वका केही पक्ष उदाङ्गो पारेको छ।” जनताको एजेन्डा स्थापित गर्न पार्टीभित्र निरन्तर सङ्घर्ष गरे पनि सफल हुन नसकेको उनको भनाइ छ।
“रुकुमका जनतासँगको दुःख–सुखको सम्बन्ध जोगाइराख्न पार्टीभित्र धेरै प्रस्ताव राखेँ, तर सुनुवाइ भएन,” शर्माले भने, “हामीले १२० सिट जितेको पार्टी क्रमशः खुम्चिँदै २–३ सिटमा सीमित हुने अवस्थामा पुग्यो।”
