माघ १६,काठमाडौँ । प्रधानमन्त्री सुशीला कार्कीले सहिदको साहस, चेतना र संकल्पका कारण आज देश परिवर्तनको ऐतिहासिक मोडमा उभिएको बताएकी छन्।
सहिद दिवसका अवसरमा बुधबार जारी गरेको शुभकामना सन्देशमार्फत उनले नागरिक स्वतन्त्रता र लोकतन्त्रका लागि आफ्नो अमूल्य जीवन अर्पण गर्ने सबै सहिदप्रति हार्दिक श्रद्धाञ्जली व्यक्त गरिन्।
प्रधानमन्त्री कार्कीले सन्देशमा सहिदहरूको बलिदानले देशलाई नयाँ दिशातर्फ अघि बढ्न प्रेरित गरेको उल्लेख गर्दै अब कुनै पनि आमाको काख फेरि रित्तिन नपरोस् भन्ने कामना व्यक्त गरेकी छन्। न्याय, समानता, उत्तरदायी शासन र उज्यालो भविष्यको आकांक्षामा उठेको जेन–जी आन्दोलनका क्रममा सहादत प्राप्त वीर योद्धाहरूप्रति पनि उनले नमन गरेकी छन्।
सन्देशमा उनले शासकीय मूल्य, नैतिकता र नागरिकको सम्मानमा आधारित राज्य निर्माण गर्ने दायित्व सधैँ प्रत्येक शासकको स्मरणमा रहनुपर्नेमा जोड दिएकी छन्।
