काठमाडौं, माघ २९
निर्वाचन आयोगले प्रत्यक्ष निर्वाचन प्रणालीतर्फका उम्मेदवारहरूलाई आगामी फागुन ३ गतेभित्र आफ्नो निर्वाचन घोषणापत्र सम्बन्धित निर्वाचन अधिकृतको कार्यालयमा बुझाउन आग्रह गरेको छ। निर्वाचन आचारसंहिता, २०८२ को दफा ३७ अनुसार उम्मेदवारहरूले घोषणापत्र सार्वजनिक गरी त्यसको एक प्रति निर्वाचन अधिकृतको कार्यालयमा पेस गर्नुपर्ने व्यवस्था छ। सोही व्यवस्थाअनुसार आयोगको माघ २७ गतेको निर्णयका आधारमा प्रत्यक्षतर्फका सबै उम्मेदवारलाई शाखा अधिकृत (कानुन) अरुण अधिकारीमार्फत पत्राचार गरिएको आयोगले जनाएको छ।
आयोगले सबै प्रदेश तथा जिल्ला निर्वाचन कार्यालयलाई प्राप्त घोषणापत्रको अभिलेख व्यवस्थित रूपमा राखी त्यसको विवरण आयोगमा पठाउन निर्देशन दिएको छ। साथै सम्बन्धित निर्वाचन अधिकृतको कार्यालयलाई समेत आवश्यक जानकारी गराउन आयोगले अनुरोध गरेको छ। यसअघि नै आयोगले सबै राजनीतिक दललाई पनि फागुन ३ गतेभित्र दलीय निर्वाचन घोषणापत्र सार्वजनिक गर्न पत्राचार गरिसकेको छ।
