ए आईले अमेरिकामा युवाको रोजगारी घटायो

साक्रामेन्टो (अमेरिका), भदौ ११ गते। कृत्रिम बुद्धिमत्ता (एआई)को प्रयोगले अमेरिकामा २२ देखि २५ वर्ष उमेर समूहका कामदारहरू उच्च जोखिममा परेका छन्। सन् २०२२ को अन्त्यदेखि एआई–सम्बन्धित व्यवसायमा रोजगारी १३ प्रतिशतले घटेको तथ्य अध्ययनले देखाएको छ।

यो अध्ययन स्ट्यानफोर्ड विश्वविद्यालयका अर्थशास्त्री एरिक ब्रिनजोल्फसन, भारत चन्द्र र रुयु चेनले संयुक्त राज्य अमेरिकाको सबैभन्दा ठूलो पेरोल प्रोसेसिङ कम्पनी अटोमेटिक डाटा प्रोसेसिङ को तथ्याङ्क प्रयोग गरी गरेका हुन्। यसमा सन् २०२५ जुलाईसम्मका दशौँ हजार कम्पनीको रोजगारी ढाँचा ट्र्याक गरिएको थियो।

अध्ययनको निष्कर्षअनुसार, च्याटजिपिटीजस्ता उत्पादक एआई उपकरणले पहिलो पटक ठूलो स्तरमा रोजगारी बजारलाई पुनःआकार दिइरहेको ठोस प्रमाण प्रस्तुत भएको छ। विशेषगरी, जेनेरेटिभ एआईलाई व्यापकरूपमा अपनाएपछि प्रारम्भिक करियरका कामदारहरू प्रभावित भएका छन्। कम्पनी स्तरका अन्य प्रभावलाई नियन्त्रण गरेपछि पनि उनीहरूले रोजगारीमा १३ प्रतिशत गिरावट भोगेका छन्।

अध्ययनले जागिर कटौतीलाई मुख्य कारण र तलब कटौतीलाई दोस्रो कारणका रूपमा औंल्याएको छ। यसले युवा सफ्टवेयर विकासकर्ता र ग्राहक सेवा प्रतिनिधिमाथि सबैभन्दा ठूलो असर पारेको देखाएको छ। २२ देखि २५ वर्ष उमेर समूहका सफ्टवेयर विकासकर्ताको रोजगारी सन् २०२२ अन्त्यमा देखिएको शिखर अवस्थाबाट झण्डै २० प्रतिशतले घटेको छ, जबकि वृद्ध कामदारहरूको रोजगारी स्थिर वा बढ्दो देखिएको छ।

शोधकर्ताले एआई–प्रभावित रोजगारीमा युवा कामदारहरूको गिरावटलाई अमेरिकी कार्यबलमा हुने आगामी ठुलो परिवर्तनको प्रारम्भिक चेतावनीका रूपमा व्याख्या गरेका छन्। उनीहरूले ३५ देखि ५० लाख कामदारको मासिक पेरोल अभिलेख विश्लेषण गर्दै रोजगारी वर्गीकरणलाई अघिल्ला अध्ययनमा परिभाषित एआई–एक्सपोजर सूचकसँग जोडेका थिए।

नतिजामा, एआईले कार्य स्वचालित गर्ने व्यवसायमा तीव्र गिरावट देखिएको छ भने मानव क्षमतामा सहयोग गर्ने व्यवसायमा निरन्तर वृद्धि देखिएको छ। यो प्रवृत्ति सन् २०२२ नोभेम्बरमा च्याटजिपिटी सार्वजनिक भएपछि तीव्र भएको हो। सन् २०२५ को मध्यसम्ममा, अमेरिकी सर्वेक्षणमा सहभागीमध्ये ४६ प्रतिशतले आफ्ना कार्यस्थलमा ठूला भाषा मोडेल प्रयोग भएको बताएका छन्।

यद्यपि, अध्ययनले एआईको प्रभाव व्यवसाय अनुसार फरक–फरक देखाएको छ। स्वास्थ्य सहयोगी, नर्सिङ सहायक र अन्य कम एआई–प्रभावित भूमिकामा युवा कामदारको रोजगारी बढेको छ। शोधकर्ताले एआईले विद्यालयमा सिकाइने संहिताबद्ध ज्ञानलाई प्रतिस्थापन गर्न सक्ने तर कार्य अनुभवबाट प्राप्त मौन ज्ञानलाई प्रतिस्थापन गर्न नसक्ने निष्कर्ष निकालेका छन्।