दोहोरो अंकले घट्यो नेप्से

 माघ ७,काठमाडौं : साताको दोस्रो दिन पनि नेप्से परिसूचक ओरालो लागेको छ । आइतबार घटेको बजार सोमबार दोहोरो अंकले घटेको हो ।

सेयर बजारमा एकलौटी अग्रता जमाएको माथिल्ल्लो तामाकोसीको सेयर मूल्यमा सोमबार पनि गिरावट आइ उच्च कारोबार हुँदा परिसूचकलाई टेवा नपुगेको हो । तामाकोसीको सेयर मूल्य १० प्रतिशतले घटेर २ सय ६३ रुपैयाँ पुग्दा बजारमा १० करोड ९१ लाख रुपैयाँको सेयर कारोबार भएको छ ।

फलस्वरुप, यसदिन माथिल्लो तामाकोसीको सेयरको प्रभावमा बजार पर्दा परिसूचक तामाकोसीकै लयमा हिँडेको हो । किनकी बजाको कारोबार रकममध्ये ३६ करोड ७७ लाख रुपैयाँको कारोबार भएकोमा माथिल्लो तामाकोसी एक्लैको १० करोडको भएको हो ।

यसदिन कारोबार सुरु हुनासाथ घट्न थालेको बढेको तामाकोसी जलविद्युत कम्पनीको सेयर मूल्य बजार बन्द हुनेबेलासम्म १० प्रतिशतले घटेको हो । नेप्से परिसूचक पनि सोही दिशामा ओरालो लागिरह्यो ।

गत पुस २९ गतेदेखि कारोबार सुरु भएको तामाकोशीको सेयर मूल्य ५ दिनसम्म निरन्तर बढेर आइतबारदेखि घटेको हो ।

घट्नेक्रममा सेयर बजारमा नेप्से परिसूचक १०.८६ अंकले घटेर ११६८.०६ अंकमा कायम भयो । सेन्सिटिभ इन्डेक्स पनि १.८७ अंकले घटेर २४७.६१ अंकमा पुगेर रोकियो ।

बजारमा करिब ३७ करोडको कारोबार हुने क्रममा बजारमा १६६ कम्पनीका १२ लाख ६५ हजार कित्ता सेयर किनबेच भए ।

यसदिन कारोबारमा आएका ११ समूहमध्ये १० समूहका उपसूचक घटे । त्यसमध्ये जीवन बीमा समूह सर्वाधिक ६१.६८ अंकले घट्यो । नेप्से परिसूचक घट्दा बजारमा गुर्खा फाइनान्सकाका सेयरधनीले सर्वाधिक कमाए । कम्पनीको सेयर मूल्य ४.८१ प्रतिशतले बढ्यो ।