राष्ट्र बैंकद्वारा लचिलो मौद्रिक नीति सार्वजनिक, कर्जाको सीमा वृद्धि [पूर्ण पाठसहित]

काठमाडौँ, असार २७ — नेपाल राष्ट्र बैंकले आगामी आर्थिक वर्ष २०८२/८३ का लागि लचिलो र सचेतनाका साथ तयार पारिएको मौद्रिक नीति सार्वजनिक गरेको छ। शुक्रबार सार्वजनिक गरिएको नीति राष्ट्र बैंकका गभर्नर डा. विश्वनाथ पौडेलले ‘सजगतापूर्वक लचिलो नीति’ भएको उल्लेख गरे।

मौद्रिक नीतिमा दोस्रो वित्तीय क्षेत्र रणनीति स्वीकृत गरी कार्यान्वयनमा ल्याइने उल्लेख छ। साथै, ब्याजदर करिडोरको माथिल्लो सीमा अर्थात् बैंकदर ६ प्रतिशत र नीतिगत दर ४.५ प्रतिशत निर्धारण गरिएको छ। यसअघि बैंकदर ६.५ प्रतिशत र नीतिगत दर ५ प्रतिशत रहेको थियो।

नयाँ नीतिअनुसार निजी आवासीय घर निर्माण वा खरिदका लागि प्रवाह गरिने कर्जाको सीमा दुई करोडबाट बढाएर तीन करोड रुपैयाँ पुर्‍याइएको छ। पहिलो घर निर्माण वा खरिदको हकमा कर्जा–मूल्य अनुपात ८० प्रतिशतसम्म र अन्य अवस्थामा ७० प्रतिशतसम्म कायम गर्न सकिने व्यवस्था गरिएको छ।

त्यसैगरी, व्यक्तिगत सेयर धितो कर्जाको सीमा पनि १५ करोड रुपैयाँबाट बढाएर २५ करोड रुपैयाँ पुर्‍याइएको छ। विदेश भ्रमणमा जाने नेपाली नागरिकले बोक्न सक्ने विदेशी मुद्राको सीमा २,५०० अमेरिकी डलरबाट बढाएर ३,००० अमेरिकी डलर बनाइएको छ।

मौद्रिक नीतिमा आगामी वर्ष निजी क्षेत्रतर्फ कर्जा प्रवाह १२ प्रतिशतले वृद्धि हुने लक्ष्य राखिएको छ। राष्ट्र बैंकले कर्जामा सहजता ल्याउँदै आर्थिक गतिविधिमा सन्तुलन कायम राख्न नीति लचिलो बनाइएको स्पष्ट पारेको छ।