पाकिस्तान यु–१९ एसिया कपको फाइनलमा, नेपाल र अफगानिस्तानबीचको विजेतासँग खेल्ने

काठमाडौं । पाकिस्तान मलेसियामा जारी एसीसी यु–१९ एसिया कप क्रिकेटको फाइनलमा प्रवेश गरेको छ । बिहिबार भएको पहिलो सेमिफाइनलमा बंगलादेशलाई डर्कवर्थ लेविस (डिएल) पद्धतिको आधारमा २ रनले पराजित गर्दै पाकिस्तानले फाइनलमा स्थान बनाएको हो ।

अब पाकिस्तानले उपाधिको लागि नेपाल र अफगानिस्तानको विजेतासँग प्रतिस्पर्धा गर्नेछ । नेपाल र अफगानिस्तानबीचको दोस्रो सेमिफाइनल खेल शुक्रबार हुनेछ । फाइनल खेल भने आइतबार हुनेछ ।

मलेसियाको किनरारा ओभल मैदानमा बंगलादेशले दिएको २७५ रनको लक्ष्यसहित पाकिस्तानले जवाफी ब्याटिङ गरिरहँदा खेल वर्षाले प्रभावित गरेपछि खेलको नतिजा डिएल पद्धतिबाट गरिएको हो । खेल वर्षाले रोकिनुअघि पाकिस्तानले ३९ ओभरमा ५ विकेट गुमाएर १९९ रन बनाएको थियो । 

खेल रोकिनुअघि पाकिस्तानलाई जितका लागि ७९ रनको आवश्यकता रहेको थियो । पाकिस्तानाका लागि मोहमद ताहाले ९२ रनको योगदान दिँदा साद खानले अविजित ३५ रन जोडे । बंगलादेशका क्वाजी इस्लामले २ विकेट लिए ।

यसअघि टस हारेर पहिले ब्याटिङको निम्तो पाएको बंगलादेशले पूरै ५० ओभर खेल्दै २७४ रन बनाएको थियो ।  बंगलादेशका लागि पिनाक घोषले ८२ तथा सइफ हुसेनले ६१ रन जोडेका थिए । पाकिस्तानका मुनिर रियाजले ३ विकेट लिए ।