आजका पत्रपत्रिकाका फ्रन्टपेज

१७ भदौ, काठमाडौं । बाढीका कारण केही दिनअघिसम्म सुस्त देखिएका प्रदेश नं. २ का जिल्लामा अहिले चुनावी सरगर्मी बढेको छ । आसन्न स्थानीय तहको निर्वाचनमा राष्ट्रिय जनता पार्टी (राजपा) पनि सहभागी भएपछि चुनावी रौनक बढेको आजका पत्रपत्रिकाहरुले लेखेका छन् । ‘प्रमुख दलहरुले प्रदेश २ को स्थानीय तह चुनावलाई अघिल्लो चरणको निर्वाचनको तुलनामा अझ ठूलो राजनीतिक प्रतिष्ठाका रुपमा लिएका छन् । उनीहरुबीच जसरी पनि आफ्नो दललाई पहिलो स्थान दिलाउने होडबाजी चलेको छ,’ आजका पत्रिकाहरुले प्रदेश २ को चुनावी चहलपहलको विश्लेषण गर्दै लेखेका छन् ।

प्रमुख निर्वाचन आयुक्त अयोधीप्रसाद यादवले अब हुने निर्वाचनहरुमा आचारसंहिता पालनामा शून्य सहनशीलताको नीति अपनाइने भनेर व्यक्त गरेको भनाइलाई पनि आजका पत्रपत्रिकाहरुले उत्तिकै स्थान दिएर छापेका छन् ।

आयल निगम जग्गा घोटाला प्रकरणदेखि बाढीपीडितका दुःख आजका पत्रपत्रिकामा पोखिएका छन् ।

प्रधानमन्त्री शेरबहादुर देउवाले तोकिएकै समयमा निर्वाचन हुन्छ भनेर व्यक्त गरेको भनाइलाई आज गोरखापत्र दैनिकले मुख्य खबर बनाएर छापेको छ । आचारसंहिताको पालनामा कडाइ गर्ने निर्वाचन आयोगको अभिव्यक्तिलाई पनि गोरखापत्रले पहिलो पृष्ठमा समेटेको छ । प्रदेश नं. २ मा निर्वाचन चहलपहल बढ्योलाई गोरखापत्रले एंकर बनाएको छ ।

अन्नपूर्ण पोस्ट दैनिकले नक्कली अलैंचीले मूल्य घटेको लेखेको छ । अन्नपूर्णमै स्वास्थ्यको भवन निर्माणमा लापरवाही भएको र डेढ सय योजना वर्षौंदेखि अलपत्र रहेको समाचार छ । बाढीपीडितको पीडालाई पनि अन्नपूर्णले पहिलो पृष्ठमा स्थान दिएर छापेको छ ।

पाकिस्तानी जेलबाट एक नेपालीले नेपाल फर्कन गरेको पुकारलाई नागरिक दैनिकले मुख्य खबर बनाएर पस्केको छ । बाढीपीडितका दुःखलाई पनि आज नागरिक दैनिकले समेटेको छ ।

नयाँ पत्रिका दैनिक र कान्तिपुर दैनिकले २ नम्बर प्रदेश निर्वाचनमय बनेको लेखेका छन् । कान्तिपुरले कक्षा १२ को नतिजा कमजोर आउनुको कारण केलाएको छ ।