एमाले महाधिवेशनस्थलमा लोकगायिका ज्योती मगरको सहभागिता

पुस १, काठमाडौं । चर्चित लोकगायिका ज्योती मगर नेकपा एमालेको महाधिवेशनस्थल भृकुटीमण्डपमा देखिएकी छन् । उनी एक उम्मेदवारको समर्थनमा जुलुसमा सहभागी भइन् ।

जनजाति समुदायका उम्मेदवारहरूको समर्थनमा आयोजित झाँकी प्रदर्शनमा ज्योती मगर उत्साहपूर्वक सहभागी भएकी थिइन् । उनको हातमा पूर्ण गुरुङलाई विजयी गराउन अपिल गरिएको पोस्टर देखिन्थ्यो ।

जुलुसका सहभागीले ‘आयो एमाले आयो, पूर्ण गुरुङ आयो…’ भन्दै नाराबाजी गरेका थिए । उक्त नारासँगै ज्योती मगरले नाच्दै समर्थन जनाएकी थिइन् ।

सञ्चारकर्मीहरूसँग संक्षिप्त प्रतिक्रिया दिँदै उनले महाधिवेशनस्थलको वातावरण निकै उत्साहजनक र रमाइलो रहेको बताइन् । आफू उम्मेदवार नभए पनि पूर्ण गुरुङको समर्थनमा सहभागी भएको उनले स्पष्ट पारिन् ।

‘समावेशीताको विषय र पुस्तान्तरणको आवश्यकता महत्वपूर्ण छ । त्यसैले युवा नेता पूर्ण गुरुङलाई समर्थन गरेको हुँ,’ ज्योती मगरले भनिन् ।

ज्योती मगर औपचारिक रूपमा एमाले प्रवेश गरेकी छैनन् । यद्यपि, पछिल्ला विभिन्न अन्तरवार्तामा उनले एमाले र अध्यक्ष केपी शर्मा ओलीप्रति सद्भाव व्यक्त गर्दै आएकी छन् ।