९ लाख घुससहित डिभिजन सडक कार्यालयका प्रमुख सहित तीन जना अख्तियारद्वारा पक्राउ

साउन २४, काठमाडौं । योजनाहरुको भुक्तानी तथा पेश्की भुक्तानी गर्ने सवालमा सेवाग्राहीसँग घुस लिँदै गरेको अवस्थामा अख्तियारले डिभिजन सडक कार्यालयका प्रमुख सहित तीन जनालाई पक्राउ गरेको छ ।

आयोगले डिभिजन सडक कार्यालय पोखरा अन्तर्गत भइरहेका विभिन्न योजनाहरुको भुक्तानी तथा पेश्की भुक्तानी गरे वापत जी. एस. आर. निर्माण सेवा पोखराका प्रोपाइटर र सडक डिभिजन कार्यालयका कर्मचारीबीच घुस लिनेदिने कार्य भइरहेको गोप्य सुचनाको आधारमा उनीहरुलाई हिजो रंगेहात पक्राउ गरेको जनाएको छ ।

आयोगका प्रवक्ता प्रदीप कोइरालाका अनुसार घुस रकम लिँदै गरेको अवस्थामा पक्राउ पर्नेहरुमा डिभिजन सडक कार्यालय पोखराका कार्यालय प्रमुख हरिकुमार पोखरेल, इन्जिनियर पवित्रमणी आचार्य र कार्यालय सहयोगीहरु सन्देश लम्साल र शिवराम शर्मालाई ९ लाख घुस रकम सहित नियन्त्रणमा लिइएको छ ।

उनीहरुलाई डिभिजन सडक कार्यालयको सरकारी निवासबाट पक्राउ गरीएको हो । घुस रकम दिए लगत्तै उक्त सरकारी निवासबाटै फरार जी। एस। आर। निर्माण सेवाका प्रोप्राइटर ऋषि गौतमलाई जिल्ला प्रहरी कार्यालय कास्कीको सहयोगमा पक्राउ गरीएको छ ।