चिसोकै कारण सिरहामा एक बालक सहित तीन जनाको मृत्यु भएको छ । धनगढीमाई नगरपालीका ७ कसहाका ५५ वर्षिय रामरतन महतो र गोलबजार नगारपालीका ४ का शम्भु साहका ६ वर्षिय छोरा लभ कुमार साहको आज विहान मृत्यु भएको छ भने गोलबजार २ लालपुरका ७० वर्षिय रामप्रसाद महतो हिजै मृत्यु भएको प्रहरीले जनाएको छ ।
जाडोले बेहोस भएका बालक साहको धामीझाँक्री लाउन थालेपछि मृत्यु भएको स्थानीय रामभरोसी यादवले जनाएको छ । दुवै वृद्धहरु भने दमका रोगी रहेको बताइएको छ । जाडो बढेसँगै जिल्लाको जनजीवन प्रभावित भएको छ ।अस्पतालहरुमा विरामीहरु बढेको छ । जिल्ला अस्पताल सिरहाका प्रमुख चुमनलाल दासका अनुसार जिल्लाका सवैजसो निजी तथा सरकारी अस्पताल तथा स्वास्थ्य संस्थाहरुमा रुघा खोकी, जरो, कोल्ड डायरियाका विरामीहरु बढेका छन् ।
यसैबीच अत्यधिक चिसोबढेपछि सिरहाको करजन्हा नगरपालिका ७ प्रेमनगरको मुसहर वस्तीमा धुर्मुस सुन्तली फाउन्डेसनले ६५ परिवारलाई कम्वल वितरण गरेको छ । फाउण्डेशनले उपलब्ध गराएको बल्यांकेट जनकपुरका पत्रकार शैलेन्द्र महतो सहितका समूहले वस्तीम पुगेर वितरण गरेको हो ।
