तेस्रो विश्व युद्धको तयारीमा रुस

एजेन्सी, २८ असार । रुसले संभावित तेस्रो विश्व युद्धलाई ध्यानमा राख्दै अत्याधुनिक प्रकृतिको आणविक रेलमार्ग बनाउन सुरु गरेको छ । उक्त रेलमार्गबाट विश्वको कुनै पनि क्षेत्रमा हाइड्रोजन बम प्रहार गर्न सकिने बताइएको छ ।

मालसामान ढुवानी गर्ने रेलमार्ग जस्तो देखिने नयाँ रेलमार्गको नाम बार्गुजिन राखिएको मेट्रो समाचारले जनाएको छ । यो रेलमार्गमा चल्ने हरेक ट्रेनमा ६ वटा थर्मोन्युक्लियर क्षेप्यास्त्र प्रहार गर्ने क्षमता रहने छ । गोप्य रूपमा चल्ने यो मार्गलाई कुनै पनि आक्रमणबाट ध्वस्त गर्न नसकिने पनि जनाइएको छ ।

आणविक शक्ति सम्पन्न राष्ट्र रुसले ‘शैतान–२’ नामको खतरनाक क्षेप्यास्त्र बनाउने पनि बताएको छ । यो नयाँ क्षेप्यास्त्रले १० वटासम्म वारहेड बोक्न सक्ने छ जसले औसत क्षेत्रफलको कुनै पनि मुलुकलाई तहसनसह गर्न सक्छ । यो क्षेप्यास्त प्रति सेकेण्ड ७ किलोमिटरका दरले उड्न सक्ने छ । रुसका उप प्रधानमन्त्री डिमित्री रोगोजिनले नयाँ २ आणविक प्रणाली विकास गर्न लागेको रुसी पत्रिका प्राभ्डालाई जानकारी दिएका छन् । अमेरिकासँग तनाव बढ्दै गएका कारण यस्तो गर्न लागिएको उनले बताए ।

नयाँ आणविक प्रणालीले भविष्यमा हुने कुनै पनि युद्धबाट रुसलाई सुरक्षित राख्ने त्यहाका अधिकारीले बताएका छन् । तर पश्चिमा मुलुकले भने राष्ट्रिय सुरक्षाका नाममा रुसले तेस्रो विश्व युद्धको तयारी गरिरहेको आरोप लगाएका छन् ।